Pra što novy Zakon ab moładzievaj palitycy?
Suchi zakon da 21 hodu, vajskova‑spartyŭnyja letniki i, jak varyjant, novaje Ministerstva pa spravach moładzi. Pra novy Zakon «Ab asnovach dziaržaŭnaj moładzievaj palityki» piša lider Moładzi AHP Michaś Paškievič.
24.03.2009 / 14:45
Suchi zakon da 21 hodu, vajskova‑spartyŭnyja letniki i, jak varyjant, novaje Ministerstva pa spravach moładzi — mienavita takija abnaŭleńni źbirajucca unieści narodnyja abrańniki na čarhovaj siesii parłamientu ŭ Zakon «Ab asnovach dziaržaŭnaj moładzievaj palityki». Piša lider Moładzi AHP Michaś Paškievič.
Dziaržavie patrebnyja zdarovyja, ideałahična pravilnyja maładziony. I novy Zakon skiravany mienavita na heta. Nakolki paśpiachovym jon atrymajecca, sumniavacca nie vypadaje, bo hałoŭnym vykanaŭcam paznačany dziaržaŭny orhan pa spravach moładzi. Jon ža adkazvaje za vyznačeńnie efiektyŭnaści moładzievaje palityki. I naŭrad ci kiraŭnica adździełu pa spravach moładzi Minadukacyi Irena Dyl pryznaje svaju ž pracu nieefiektyŭnaj. Praŭda, tut jaje možna zrazumieć.
Pahladzicie na ličby: 19 579 609 tys. rub. — ahulnaja suma vydatkaŭ na moładzievuju palityku u dziaržbiudžecie na 2009 h.
Z hetych srodkaŭ niepasredna struktura spadaryni Dyl «zasvojvaje» 1 737 227 tys. rub., 304 589,0 tys. rub. — Akademija Kiravańnia pry Prezidencie, a amal 90% —17 537 793 tys. rub. — pravilna, BRSM.To bok asnoŭny kavałak piraha źjadaje «hramadskaje abjadnańnie», a adkazvać za usie niedachopy maleńkamu adździełu Minadukacyi, jaki i mieścicca ŭ budynku BRSM amal pad strachoj.
Kali prajścisia pa astatnich punktach, to Zakon možna nazvać pustym i dekłaratyŭnym.U čym sens pieraličvać kanstytucyjnyja pravy i svabody i ŭ čarhovy raz padkreślivać dziaržaŭny kłopat ab moładzi? (kali cikava, to čytajcie sami).
I samaje hałoŭnaje — kryteryi pakazčykaŭ efiektyŭnaści ŭ im tak i nie prapisany.Pra nieabchodnaść ich zamacavańnia, darečy, kazali i pradstaŭniki BRSM, a mienavita sakratar CK Dałžanieŭski. Inšaja sprava, nieviadoma, što kankretna jon tut mieŭ na uvazie.
Chutčej za usio, dziaržava nie pojdzie na sastupki i anijakich kanceptualnych źmienaŭ u Zakon 1992 hodu ŭniesiena nie budzie. Adpaviedna i pracavać hetaja dekłaracyja ab dobrych namierach nie budzie.
Ale i hety zakon možna zrabić pryziemlennym i bolš žyćciastojkim. Varta zakłaści vyklučna konkursny prazrysty hałosny miechanizm vydatkoŭvańnia dziaržaŭnych resursaŭ pry realizacyi prajektaŭ i prahramaŭ. U saŭminaŭskim varyjancie (a mienavita Saŭmin raspracoŭvaŭ novy «stary» prajekt) zaraz usie praściej: «v cielach sozdanija nieobchodimych usłovij dla funkcionirovanija mołodiežnych obŝiestviennych objedinienij, vlijanija na charaktier i napravlennosť ich diejatielnosti hosudarstvo možiet okazyvať etim mołodiežnym objedinienijam matierialnuju i orhanizacionnuju poddieržku. Hosudarstviennyje orhany i orhanizacii vpravie pieriedavať v ustanovlennom poriadkie mołodiežnym obŝiestviennym objedinienijam zdanija i sooružienija, inoje nieobchodimoje dla osuŝiestvlenija ich diejatielnosti imuŝiestvo»(st.15 p.4).
To bok kamuści moža dapamahać, a kamuści — nie. Chto budzie vyrašać i jak, a hałoŭnaje , navošta, u hetym zakonaprajekcie nie skazana.Rabicie vysnovy sami. Biezumoŭna, na sto pracentaŭ miechanizm nie spracuje — čynavienstva znojdzie jaki sposab abyści i hety antykarupcyjny paroh. Ale Zakon urešcie pačnie pracavać dla usich, a nie tolki dla BRSM i pijanieraŭ sa skaŭtami. Zrazumiejcie pravilna, aŭtar zusim nie prychilnik dziaržaŭnaj padtrymki hramadskich arhanizacyj, ale kali dziaržava usie ž vyrašyła «padtrymać», to chaj robić heta prazrysta.
Kaniečnie, varta było b dadać paviedamlalny pryncyp rehistracyi moładzievych arhanizacyj i stvareńnie moładzievych parłamientaŭ, ale navat dla našaj «libieralizacyi» heta zanadta.
Pieršaje čytańnie zakonaprajektu adbudziecca 24 sakavika, a sam zakonaprajekt, jak čakajecca, stanie adnym z asnoŭnych na viesnavoj siesii pałaty. Pahladzim, što atrymajecca.