Brescki aŭtavakzał zakryŭ aŭtobusnaje złučeńnie z Polščaj praz try dni paśla adkryćcia. Pryčyna — banalnaja
25.05.2020 / 09:57
25 maja Brest zakryŭ aŭtobusnaje złučeńnie z Polščaj. Pryčyna — raspaŭsiud u śviecie karanavirusa i zakryćcio miežaŭ, skazana na sajcie aŭtavakzała. Usie mižnarodnyja rejsy admienieny. Ab adnaŭleńni ruchu budzie paviedamlena dadatkova, paviedamlaje Tut.by.
Nahadajem, 22 maja ahienctva telenavinaŭ paviedamiła pra toje, što Brescki aŭtavakzał adkryŭ złučeńnie z Polščaj. Navinu šyraka rastyražavali dziaržaŭnyja ŚMI.
Na sajcie pradpryjemstva źjaviŭsia raskład maršrutaŭ u Biała-Padlasku, Varšavu, Hdańsk i Katavicy. Usie mižnarodnyja rejsy byli sfarmavanyja polskimi pieravozčykami.
U niadzielu, 24 maja, z Tut.by źviazaŭsia pradstaŭnik polskaj kampanii-pieravozčyka, jakaja vaziła pasažyraŭ pa maršrucie Brest — Varšava. Jon paviedamiŭ, što paŭstali składanaści z prachodžańniem biełaruska-polskaj miažy ŭ palakaŭ-kiroŭcaŭ aŭtobusaŭ, jakija ŭjazdžajuć u Biełaruś biez 14-dzionnaha karancinu ŭ Polščy. Sa svajoj prablemaj pradpryjemstva źviarnułasia ŭ biełaruski Mintrans.
«Źviartajemsia z prośbaj ab chadajničańni pierad Ministerstvam achovy zdaroŭja Biełarusi ab vydačy dazvołu na ažyćciaŭleńnie ŭ červieni i lipieni 2020 hoda mižnarodnych pieravozak pasažyraŭ pa maršrucie Varšava — Brest — Varšava bieź nieabchodnaści paćvierdžańnia kiroŭcaŭ ekipažaŭ aŭtobusaŭ (jakija źjaŭlajucca hramadzianami RP) 14-dzionnaha terminu samaizalacyi. Na siońniašni dzień pa zakanadaŭstvie Polščy kiroŭcy mižnarodnych rehularnych rejsavych aŭtobusaŭ majuć prava ŭjechać na terytoryju Polščy bieź nieabchodnaści znachodžańnia na 14-dzionnaj samaizalacyi», — havaryłasia ŭ zvarocie.