Novaje śpieczadańnie Kačanavaj: sustrakajecca z prychilnikami apazicyi ŭ rehijonach i vysłuchoŭvaje ich
18.06.2020 / 13:01
Učora ŭ Baranavičach Natalla Kačanava sustrakałasia ź siabrami inicyjatyŭnych hrup alternatyŭnych pretendentaŭ u kandydaty.
Natalla Kačanava, fota Nadziei Bužan
Sustreča adbyłasia ŭ haradskoj biblijatecy. Na joj prysutničała kala 30 čałaviek. Heta zborščyki podpisaŭ štabaŭ Babaryki, Capkały, Cichanoŭskaj, Dźmitryjeva, apazicyjnyja aktyvisty. Z zaprašeńniem na sustreču ludziej abzvońvaŭ staršynia Baranavickaha haradskoha Savieta deputataŭ Ryhor Kasabucki.
«Skazaŭ, što budzie hutarka nakont vybaraŭ, budzie Natalla Ivanaŭna, zmožam parazmaŭlać i zadać pytańni», — raskazaŭ «Našaj Nivie» adzin z udzielnikaŭ.
Na ŭvachodzie ludziej nie abšukvali. Zapisali tolki imia, proźvišča i miesca pracy. Na hanku biblijateki dziažuryła milicyja. Padčas sustrečy zabaranili zdymać fota i videa.
Pra što viałasia razmova ŭ biblijatecy?
«U Natalli Ivanaŭny było niekalki pasyłaŭ. Pieršy — takich ludziej, jak Alaksandr Ryhoravič, jana ŭ žyćci nie bačyła, jon kruty, i jana ź im da kanca. Druhi — vas [tych, chto nie padtrymlivaje Łukašenku. — «NN»] vielmi mała, i vy pustym zajmajeciesia. Ź jaje boku, vierahodna, tak i vyhladaje. Pryjazdžaje na zavody — tam stajać usie, uśmichajucca. Mahčyma, jana nie kryviła dušoj. I treci pasył — nijakich falsifikacyj nie było».
Kali adzin z udzielnikaŭ sustrečy prapanavaŭ vyjści na vulicu i apytać pieršyja dziesiać čałaviek, za kaho jany prahałasujuć, Kačanava admoviłasia: maŭlaŭ, heta ž niezakonnaje sacyjałahičnaje apytańnie.
Pa nazirańniach prysutnych, u bok Cichanoŭskich i Capkały Kačanava asabliva nie vykazvałasia. A voś da Babaryki była nastrojena niehatyŭna.
«Kazała jašče, što Dźmitryjevu rabotu prapanoŭvali. Nie premjeram, nie ŭ Ministerstvie, ale dobraja pasada, hatovy ŭziać», — pierakazali «Našaj Nivie» detali toj sustrečy.
Ludzi adznačajuć, što Kačanava dziejničała vielmi prafiesijna — niezdarma razmaŭlać z narodam adpraŭlajuć mienavita jaje.
«Natalla Ivanaŭna — kruty pieramoŭščyk. Bačyŭ, jak jana prasoŭvała idei. Cisnuła, što jana z naroda, siastra — švačka. Kazała: za stolki hod nas inšyja krainy stali pavažać. Bačačy našy iraničnyja tvary, joj było niaprosta havaryć. Nahadvała, što ŭ nas sacyjalnaja dziaržava, jakaja kłapocicca pra ludziej. Jana viedaje, jak čaplać, jak siabie pavodzić, kab ty ź joj pahadžaŭsia», — dzielicca ŭražańniami adzin z zaprošanych.
U Kačanavaj pytalisia, čamu ŭ krainie niama biełaruskamoŭnaha ŭniviersiteta, spračalisia nakont falsifikacyj. Ad niazručnych pytańniaŭ, kštałtu «Jak reahavać na zajavy kiraŭnika krainy pra šałudzivych?», jana starałasia syści.
«My spačatku nie mahli zrazumieć, što joj naohuł ad nas treba. Natalla Ivanaŭna padkreśliła, što pryjechała pa daručeńni Alaksandra Ryhoraviča. Vyhladała heta tak, byccam jana chacieła pahladzieć našu reakcyju, na što my, z rehijonaŭ, hatovyja. Jak nam padałosia, heta było pramacvańnie», — miarkujuć ludzi.