Najbujniejšaja ekanomika śvietu imkliva vychodzić z kryzisu
22.06.2020 / 08:24
Najbujniejšaja ŭ śviecie amierykanskaja ekanomika chutka adužvaje paśla vyklikanaha karanavirusam spadu. Palityki radujucca: kryzis skončyŭsia, nie pačaŭšysia. Ekanamisty papiaredžvajuć: śviatkavać niama čaho, usio vielmi chistka, i, kali pierapynić hrašovuju terapiju raniej času, šnary nie rassmokčucca cełaje pakaleńnie, piša bbc.com.
ZŠA ŭpeŭniena apiaredžvajuć inšyja krainy pa kolkaści śmierciaŭ ad Covid-19, a chaatyčny adkaz Donalda Trampa na najbujniejšy kryzis jaho prezidenctva pamianšaje jaho šancy pieraabracca na druhi termin na listapadaŭskich prezidenckich vybarach. Bieły dom śpiašajecca pieraharnuć sumnuju staronku i viarnucca da vybarčaj kampanii, asnoŭnym kozyram jakoj da pandemii i karancinu była mocnaja ekanomika.
Paśla tydnia stanoŭčaj statystyki Tramp sabraŭ pieršy za doŭhi čas mitynh i pachvaliŭsia pośpiechami.
«Vašy prybytki krychu ŭpali, ale my viarnuli ŭsio nazad. Fondavy rynak bje rekordy. U nas fienamienalnaja ekanomika, nas čakaje vydatny treci kvartał. I kali my nie narobim hłupstvaŭ 3 listapada (u dzień vybaraŭ), nastupny hod dla našaj ekanomiki budzie najlepšym u historyi», — skazaŭ Tramp hrupie prychilnikaŭ, jakija źjechalisia na vychodnych u Akłachomu.
Padstavy dla aptymizmu ŭ jaho jość. Zvaroty pa dapamohu pa biespracoŭi źnižajucca ŭžo 11 tydniaŭ zapar, roźničnyja prodažy ŭźlacieli ŭ mai na niabačanyja 18%, dazvołaŭ na budaŭnictva žylla vypisana až na 14% bolš, a pramysłoŭcy ŭpieršyniu ź lutaha demanstrujuć u apytańniach upeŭnienaść u budučyni.
«U nas vydatnyja šancy na toje, što ekanomika adnovicca tak ža imkliva, jak jana hłuchła, — skazaŭ za tydzień da mitynhu Trampa jaho hałoŭny ekanamičny daradca Łary Kadłoŭ. — Ja dumaju, u druhim paŭhodździ nas čakaje salidny rost VUP adsotkaŭ na 20, a biespracoŭje apuścicca nižej za 10%».
Entuzijazm Biełaha doma nie padzialaje hałoŭny niezaležny acenščyk ekanamičnaj situacyi ŭ krainie — kiraŭnik amierykanskaha Centrabanka Džierom Paŭeł.
«Vypusk tavaraŭ i pasłuh, roŭna jak i zaniataść, zastajucca na ŭzroŭni značna nižej za dakryzisny, a z nahody terminaŭ i maštabaŭ adnaŭleńnia isnuje surjoznaja niavyznačanaść».
«Pakul nasielnictva nie pavieryć, što ź virusam skončana, poŭnaje adnaŭleńnie małavierahodna», — papiaredziŭ jon kanhresmienaŭ.