Міністр сувязі: Нелегальных лакальных камп’ютэрных сетак у Беларусі быць не павінна
16.04.2009 / 12:19
Нелегальных лакальных камп’ютэрных сетак у Беларусі быць не павінна. Такое меркаванне выказаў міністр сувязі і інфарматызацыі Мікалай Панцялей 16 красавіка на прэс‑канферэнцыі ў Мінску.
Адказваючы на пытанне пра існаванне гэтак званых дамашніх камп’ютэрных сетак, міністр заявіў:
«Уладальнікі гэтых сетак займаюцца неліцэнзійнай дзейнасцю, і гэта з’яўляецца фактам. Я думаю, што такая з’ява не павінна мець месца ў нас у краіне».
У Беларусі, працягнуў Панцялей, ёсць магчымасць распрацаваць дакументацыю і афіцыйна пабудаваць сеткі, атрымаць ліцэнзіі і законна займацца камерцыйнай дзейнасцю.
«Дзейнасць, што вядзецца з парушэннем заканадаўства, натуральна, павінна быць спынена адпаведнымі санкцыямі з боку органаў, якія вядуць кантроль за выкананнем заканадаўства ў галіне прадпрымальніцкай дзейнасці», — падкрэсліў міністр.