U Ždanovičach pad dom dla siłavikoŭ źbirajucca źniščyć małady skvier
20.10.2020 / 18:37
«Nu, tady zrazumieła! Tady možna siekčy», — sarkastyčna adreahavali ludzi na infarmacyju pra toje, što ŭ 16-paviarchoviku, jaki źbirajucca budavać u Ždanovičach, pałovu kvater atrymajuć supracoŭniki MUS.
Prezientacyja prajekta adbyłasia 20 kastryčnika ŭ miascovym vykankamie i sabrała bolš za paŭsotni ludziej. Schod praviali jak častku hramadskaha abmierkavańnia, jakoje skončycca 30 kastryčnika.
16-paviarchovy dom (a faktyčna — dva damy-«słupki») źbirajucca pastavić u samym kancy praśpiekta Pieramožcaŭ, na miescy maładoha parku imia doktara Ivana Zdanoviča, zasnavalnika Ždanovičaŭ.
Kali ludzi pačali aburacca hetym faktam, pradstaŭnik zabudoŭščyka ich pierapyniŭ: «A ŭ vas jość dakumienty na park?»
Budaŭnictvam zajmajecca žyłlova-budaŭničy spažyviecki kaapieratyŭ «Soniečny-2020». Jak paviedamiŭ žycharam Ždanovičaŭ jaho pradstaŭnik, rašeńnie ab budaŭnictvie prymałasia na ŭsich uzroŭniach — «až da prezidenta Respubliki Biełaruś».
Adnak padčas razmovy vyśvietliłasia, što zabudoŭščyk i pradstaŭniki ŭpraŭleńnia architektury Minskaha rajona nie majuć adkazaŭ na istotnyja pytańni: jak budzie vyrašacca prablema ź jakaściu vady ŭ Ždanovičach, z pierapoŭnienymi i tak škołaj i sadkami, z niedachopam parkovačnych miescaŭ; ci budzie padčas budaŭnictva vytrymanaja adlehłaść ad «čyrvonych linij» Hienpłana Minska — z raźvićciom horada tut zapłanavana zrabić vyjezd na maładziečanskuju trasu. Nie było adkazu navat na pytańnie, ci ŭ rašeńni instancyj zapłanavany mienavita 16-paviarchovik, a nie mienšy dom: bo ŭčastak nievialiki, a zusim pobač jašče dva šmatpaviarchoviki.
Udzielniki słuchańniaŭ źbirajucca masava abskardžvać ideju budaŭnictva va ŭsich instancyjach.
ŽBSK «Soniečny-2020» byŭ zarehistravany 31 lipienia 2020. «I ŭžo tak skora maje dazvoł na budaŭnictva!» — dzivilisia ludzi padčas sustrečy.
28 lipienia Łukašenka, naviedvajučy vajskovuju častku 3214, akcentavaŭ uvahu na nieabchodnaści zabiaśpiečyć žytłom siłavikoŭ.