Калеснікаву, Цапкала і Ціханоўскую ўзнагародзілі прэміяй «Бясстрашнае слова»
07.12.2020 / 13:27
Фота Надзеі Бужан
Узнагарода імя Марціна Лютэра прысуджаная Святлане Ціханоўскай, Вераніцы Цапкала і Марыі Калеснікавай. Па словах аргкамітэта прэміі, гэтыя тры жанчыны сімвалізуюць барацьбу дзясяткаў тысяч мірных дэманстрантаў за палітычныя перамены ў Беларусі. Цырымонія ўзнагароджання пройдзе 24 красавіка ў нямецкім Вормсе, паведамляе тэлеграм-канал Віктара Бабарыкі.
Прэмія «Бясстрашнае слова» заснаваная саюзам 16 гарадоў, у якіх жыў і працаваў нямецкі рэфарматар Марцін Лютар. Адзін раз у два гады яна ўручаецца людзям, якія смела абараняюць свае перакананні, сустракаючы на сваім шляху жорсткі супраціў.
Афіцыйны канал Віктара Бабарыкі спадзяецца, што Марыя Калеснікава зможа разам са Святланай і Веранікай асабіста атрымаць узнагароду.