Za abrazu eks-kiraŭnika MUS Karajeva ŭ kamientary na YouTube supracoŭnika MAZa asudzili da troch hadoŭ «chimii»
15.12.2020 / 12:31
Sud Zavodskaha rajona Minska 15 śniežnia asudziŭ pa art. 369 KK 31-hadovaha zvarščyka «MAZa» Juryja Karniłoviča za abrazu 2 lipienia hienierał-majora milicyi, na toj momant — ministra ŭnutranych spraŭ, Juryja Karajeva ŭ kamientary da videarolika na YouTube-kanale «AHP-TV», paviedamlaje spring96.org.
Minčuka pryznali vinavatym u publičnaj abrazie ministra i prysudzili da troch hadoŭ abmiežavańnia voli z nakiravańniem u vypraŭlenčuju ŭstanovu adkrytaha typu («chimii»). U sudovym pracesie sam kamientar dasłoŭna ahučany nie byŭ z-za taho, što ŭtrymlivaŭ nienarmatyŭnuju leksiku, ale sens jaho zvodziŭsia da nastupnaha: «Karajeŭ spałochajecca chutčej, čym skaža prezidentu, što budzie vykonvać Kanstytucyju». Ni na sudzie, ni padčas śledstva paciarpieły Karajeŭ dapytany nie byŭ.
Kryminalnuju spravu razhladała sudździa Anžeła Kaściukievič. Jury Karajeŭ na sudovy razhlad nie źjaviŭsia i prasiŭ sud razhledzić kryminalnuju spravu ŭ jaho adsutnaść. Jak pakazvaje praktyka, u biełaruskich sudach heta ŭžo stała tradycyjaj, kali vysokapastaŭlenyja čynoŭniki nie źjaŭlajucca na razhlad kryminalnych spraŭ za ich abrazu. Tak, niadaŭna na sud nie źjavilisia načalnik minskaha AMAPa Dźmitryj Bałaba i eks-namieśnik ministra ŭnutranych spraŭ Alaksandr Barsukoŭ. Dvuch chłopcaŭ taksama asudzili pa artykule 369 Kryminalnaha kodeksa da abmiežavańnia voli. Adnak u adroźnieńnie ad hetych kiejsaŭ, Juryja Karajeva jak paciarpiełaha nie dapytvali navat padčas śledstva.
Pavodle abvinavačvańnia, Juryj Karniłovič svaim kamientarom da rolika palityka Anatola Labiedźki na YouTube-kanale «AHP-TB» «PRA NAS, a dakładniej pra hienierała Karajeva, jaki zdrejfiŭ sustrecca z hramadzianami» «pryniziŭ honar i hodnaść Karajeva, pryčyniŭ jamu maralnyja pakuty, padarvaŭ jaho aŭtarytet, asabistyja i prafiesijnyja jakaści, a taksama aŭtarytet orhanaŭ unutranych spraŭ u cełym».
Juryj Karniłovič na sudzie pryznaŭ vinu častkova:
«Tak, ja pisaŭ, ale ja nie liču svoj kamientar abraźlivym».
Chłopiec raspavioŭ, što na kanał «AHP-TB», jaki viadzie Anatol Labiedźka, jon byŭ padpisany i viedaje, što tam publikujucca videaroliki pra palityku. Ale na sudzie jon nie zmoh uspomnić nazvu videarolika, pad jakim jon pakinuŭ kamientar, dzie jon sam znachodziŭsia, kali pakinuŭ kamientar z telefona.
«Videarolik pahladzieŭ nie da kanca. U im išła havorka ab tym, što hienierał Karajeŭ spałochaŭsia sustrecca z narodam».
Chłopiec raspavioŭ na pracesie, što kamientar vyrašyŭ pakinuć praź nierazumieńnie, što Karajeŭ nie moža sustrecca z narodam. Karniłovič skazaŭ, što nie chacieŭ jaho abražać, a takija vykazvańni ŭ jaho asiarodździ [na «MAZie»] dapuščalnyja. Juryj dadaŭ, što na «MAZie» jon pracuje bolš za dziesiać hadoŭ, i padobnyja vykazvańni ŭ jaho pracoŭnym kalektyvie — heta narmalnaja źjava, na takija słovy nie źviartajuć uvahu.
«Ja nie dumaŭ, što kamientar budzie rascenieny jak abraza. Tym bolš, što ja byŭ zarehistravany pad svaim imiem — mnie nie było čaho chavać».
Dziaržabvinavaŭca začytała pakazańni Karniłoviča, dadzienyja im padčas śledstva ŭ vieraśni, pavodle jakich jon svaim kamientarom chacieŭ skazać, što «ministr unutranych spraŭ Karajeŭ pabaicca skazać prezidentu Łukašenku, kab toj vykonvaŭ Kanstytucyju Respubliki Biełaruś». U pratakole napisana, što jon ŭśviedamlaŭ, što ŭžytaje ŭ kamientary słova niekarektna i niedazvalalna ŭ adnosinach da ministra, ale jon nie chacieŭ jaho abražać, kamientar byŭ napisany «na emocyjach», i nie dumaŭ, što za heta jon moža być pryciahnuty da kryminalnaj adkaznaści. U sudzie jon pahadziŭsia z hetymi pakazańniami.
U materyjałach kryminalnaj spravy byli dałučanyja na 22 listach skrynšoty 970 kamientaroŭ da hetaha videa ŭ adras Juryja Karajeva. Siarod jakich byŭ kamientar Juryja Karniłoviča. Minčuk raspavioŭ na pracesie, što da jaho prychodziŭ supracoŭnik Słužby biaśpieki i paraiŭ napisać u kamientary pad videa, što jon prosić prabačeńnia pierad ministram. Akramia taho, supracoŭniki milicyi zapisali ź im pakajannaje videa. Chłopiec paprasiŭ apieratyŭnika pieradać Juryju Karajevu svaje prabačeńni. Kali im zacikavilisia orhany, to Juryj vydaliŭ svoj kamientar.
U materyjałach spravy było dałučana zaklučeńnie ekśpierta ad 30 lipienia, pavodle vysnoŭ jakoha ŭ pakinutym kamientary Karniłovičam utrymlivajecca niehatyŭnaja acenka Karajeva. Adnak na sudzie nie byli ahučanyja ni proźvišča, ni pasada i miesca pracy ekśpierta.
U chłopca niaźniataja niepahašanaja sudzimaść pavodle č. 2 art. 363 Kryminalnaha kodeksa: u studzieni 2019 hoda sud Minskaha rajona asudziŭ jaho da 2,3 hadoŭ «chimii», jakaja praź niekalki miesiacaŭ była zamienienaja na «chatniuju chimiju», a potym i zusim vyzvaleny pavodle amnistyi. Prakurorka zaprasiła ŭ suda pakarańnie dla Juryja Karniłoviča try hady abmiežavańnia voli z nakiravańniem u vypraŭlenčuju ŭstanovu adkrytaha typu. Heta samaje strohaje pakarańnie pa artykule 369 KK. Sudździa suda Zavodskaha rajona Anžeła Kaściukievič pryznačyła minčuku mienavita takoje pakarańnie.