«Chadžu da jaho štodnia». Nadzieja Znak pra źniavoleńnie svajho muža Maksima Znaka
29.12.2020 / 15:43
Fota Nadziei Bužan
Z asnoŭnaha składu Kaardynacyjnaj rady 4 čałavieki praciahvajuć znachodzicca za kratami. Jašče 18 adbyli «sutki». Advakat Maksim Znak znachodzicca za kratami ŭžo 112 dzion, piša Radyjo Svaboda.
Ad traŭnia 2020 hodu jon pracavaŭ u vybarčym štabie Viktara Babaryki. Zatym dałučyŭsia da kamandy abjadnanaha štabu. U žniŭni ŭvajšoŭ u prezydyjum Kaardynacyjnaj rady. Jahonaja žonka Nadzieja raskazała Svabodzie, jak ciapier spravy ŭ muža.
«Treba stvaryć jamu specyjalnyja ŭmovy, jakich navat recydyvistam i zabojcam nie dajuć»
«Listy da Maksima dachodziać sa składanaściami, — havoryć Nadzieja Znak. Heta takaja reč sama ŭ sabie. Niezrazumieła, čamu jany chodziać drenna. Vinšavalnyja paštoŭki ŭ tym liku. My z synam svaje paštoŭki dasyłali na pačatku śniežnia. Ale jany jašče nie ŭručanyja. Maksim niadrenna siabie adčuvaje. Zdarovy, badziory, nakolki heta mahčyma. Jak jość, usio dobra. Pieradačy robim, sustrečy adbyvajucca z advakatam. Nia tak drenna, jak mahło być. Mabyć, my nia viedajem jašče, jak moža być pa-inšamu drenna».
Nadzieja, jakaja taksama pracuje advakatkaj, pradstaŭlaje intaresy svajho muža. Tamu maje zakonnuju mahčymaść naviedvać jaho ŭ SIZA. Jana havoryć, što ad pačatku źniavoleńnia Maksima chadziła da muža kožny dzień. Pieraškodaŭ dla sustreč administracyja nia čynić. Zvyčajna jany praciahvajucca 1-2 hadziny.
«Umovy dla spatkańnia z advakatam u Maksima asablivyja, — havoryć Nadzieja. — Vielmi niazručnyja. Kabinet z hłuchimi dźviaryma i nijakaj mahčymaściu pahladzieć dakumenty, niešta tam napisać i hetak dalej. Takich kabinetaŭ u SIZA adzin ci dva. Jany vydajucca naŭmysna dla Maksima i jašče niekalkich aryštavanych. Mabyć, rozum Maksima, jahony padychod, ciaha da praŭdy — heta samaje strašnaje, što moža być u sučasnaj Biełarusi. Tamu treba stvaryć jamu specyjalnyja ŭmovy, jakich navat recydyvistam i zabojcam nie dajuć. Heta asabistaje ŭkazańnie kiraŭnictva hetaha miesca».
«Kamera maleńkaja, u sutareńni, vysokaja vilhotnaść»
18 vieraśnia na znak pratestu suprać niespraviadlivaha abvinavačańnia i ŭtrymańnia pad vartaj Maksim abviaściŭ haładoŭku, ź jakoj vyjšaŭ praź dziesiać dzion. Pa słovach žonki Nadziei, ciapier u muža prablemaŭ sa zdaroŭjem niama.
«Pačuvajecca Maksim niadrenna, — kaža Nadzieja. — Viedaju, što ŭ SIZA niechta chvareje na karanavirus, ale ŭ jahonaj, jak toj kazaŭ, «chacie» karanavirusu niama. Maksim pje vitaminy. Starajemsia pieradavać niejkija charčovyja dabaŭki, kab padtrymlivać imunitet. U kamery piać viaźniaŭ. Maksim nie raskazvaŭ dakładna, chto jany.
Kamera maleńkaja, u sutareńni. Tam vysokaja vielmi vilhotnaść, kamera drennaja. I z hetym ničoha pakul nie atrymlivajecca vyrašyć».
21 śniežnia Hienprakuratura zajaviła, što ŭ dačynieńni Maksima Znaka, Śviatłany Cichanoŭskaj, Maryi Kaleśnikavaj i inšych asobaŭ zaviali kryminalnuju spravu ab stvareńni ekstremisckaha farmavańnia i kiravańnia im. Pieršapačatkova Maksima Znaka abvinavačvali pavodle artykułu 361 (zakliki da dziejańniaŭ, skiravanych na pryčynieńnie škody nacyjanalnaj biaśpiecy).
Na hety momant, akramia Maksima Znaka, za kratami znachodziacca troje siabroŭ asnoŭnaha składu Kaardynacyjnaj rady — Maryja Kaleśnikava, Ałana Hiebremaryjam i Ksienija Łuckina. Apošniuju zatrymali ŭ spravie «Pres-klubu». Jašče 18 siabroŭ KR paśla vybaraŭ 9 žniŭnia adbyli administracyjny aryšt. Pra heta paviedamiŭ pres-sakratar Kaardynacyjnaj rady Anton Radniankoŭ.