300 «spartoŭcaŭ»: list u padtrymku Łukašenki padpisvajuć navat prybiralščycy
05.01.2021 / 18:44
30 śniežnia Nacyjanalny alimpijski kamitet badziora daŭ spravazdaču, što list spartsmienaŭ u padtrymku dziejnaj ułady padpisali piać tysiač čałaviek. Piacitysiačnaj padpisantkaj stała eks-himnastka Antanina Košal, załataja miedalistka Alimpijskich hulniaŭ 1972 hoda, zaŭvažaje «Jeŭraradyjo».
«Trybuna» zaŭvažyła, što dzieści z 4700-ch numaroŭ u śpisie stali časta sustrakacca padpisanty, u kaho ŭ hrafie dasiahnieńniaŭ značyłasia «spartsmien-amatar». Na apošnija try sotni zapisaŭ takich — ažno 117. «Jeŭraradyjo» vyrašyła pahladzieć, što za «amatary» padpisalisia pad listom spartsmienaŭ i ci majuć jany naohuł niejkaje dačynieńnie da sportu.
Amatary z rajvykankama
U lik pieršych padpisantaŭ lista jak spartsmieny-pieršarazradniki trapiŭ ceły pačak čynoŭnikaŭ sa Śvietłahorska. Nie padvioŭ Śvietłahorski rajon i na dystancyi ŭ apošnija 300 podpisaŭ. Hetym razam u śpisie znajšoŭsia staršynia Śvietłahorskaha rajvykankama Dźmitryj Alejnikaŭ (№4852), a vakoł jaho — rossyp čynoŭnikaŭ-amataraŭ. Tut amal usie: kiraŭnik spraŭ Viačasłaŭ Dzikun, kiraŭnik adździeła pa rabocie sa zvarotami Alena Šviec, načalnik finansavaha adździeła Śviatłana Kazimiarčuk i jaje namieśnica Śviatłana Klimianok. Try «Natalli» z adździeła adukacyi: Natalla Šaciła, Natalla Sałaviej i Natalla Šastakova. Kiraŭnik ideałahičnaha adździeła Ała Mańkievič, jaje namieśnica Maryna Hraviušava i hałoŭny śpiecyjalist adździeła Iryna Šynkarenka. Dźvie supracoŭnicy adździeła arhanizacyjna-kadravaj raboty — Julija Isajenka i Iryna Jembułajeva.
Tut ža — Hotsdnir Natalla (Natalja) Alehaŭna (№4850). Čałavieka z takim proźviščam Google nie viedaje. Zatoje viedaje Natallu Hotsdynier (Nataliju Hotsdinier), vykładčyka dziciačaj škoły mastactvaŭ u Čyrkavičach, ahraharadku ŭ Śvietłahorskim rajonie. I tut adrazu dva pytańni:
1. Što vykładčyk škoły mastactvaŭ robić u śpisie spartsmienaŭ?
2. Pry jakich abstavinach Natalla Alehaŭna pakinuła svoj podpis pad śpisam, kali navat nie zmahła pravilna napisać svaje imia i proźvišča?
Zahadčyk haspadarki — baskietbalist sa Skidziela
Adznačyłasia i Skidzielskaja dziciača-junackaja spartyŭnaja škoła. Jana zapisała 24 svaich supracoŭnikaŭ u «baskietboł». Nijakich razradaŭ i spartyŭnych dasiahnieńniaŭ. Tolki karotki podpis «śpiecyjalist Skidzielskaj DIUSŠ». Chto siarod ich? Dyrektar Alaksandr Furmanaŭ, supracoŭnica adździeła kadraŭ Palina Sinkievič, buchhałtary Aksana Saŭko i Vieranika Čabatarevič, namieśnik dyrektara pa administracyjna-haspadarčaj rabocie Siarhiej Žytko i jašče 19 supracoŭnikaŭ škoły, pra jakija ničoha nie viadoma.
Centr alimpijskaj padrychtoŭki «Stajki» zapisaŭ 16 supracoŭnikaŭ u raździeł «adzinaborstvy». Siarod ich načalnik vučebna-spartyŭnaha adździeła Valeryj Cimachovič, viadučy juryskonsult Alena Bondar i Halina Hučak, jakaja była ŭ składzie vybarkamaŭ z prezidenckich vybaraŭ 2015 hoda. I jašče 13 roznych rabotnikaŭ centra.
I znoŭ Śvietłahorsk. Samy spartyŭny rajon!
Znajšlisia siarod «spartsmienaŭ» i supracoŭniki śvietłahorskaj milicyi. Padpisantami lista stali kiraŭnik RAUS Alaksandr Ziazietka, jaho pieršy namieśnik načalnika adździeła Departamienta achovy Alaksiej Maročka i namieśnik pa ideałahičnaj rabocie Alaksiej Matusievič.
Jość siarod padpisantaŭ i siabry Fiederacyi prafsajuzaŭ Biełarusi: staršynia Śvietłahorskaha rajonnaha abjadnańnia prafsajuzaŭ Łarysa Viaraksič, kiraŭnik rajonnaha prafsajuza rabotnikaŭ adukacyi i navuki Iryna Klimianok, ahrapramysłovaha kompleksu Michaił Novik.
Prybiralščycy z kluškami ź Lidy
Lidskaja DIUSŠ zapisała 24 svaich supracoŭnikaŭ u «chakiej z šajbaj». Siarod ich buchhałtar Łarysa Dubatoŭka, inžynier Barys Bujko i dźvie prybiralščycy Alena Nos i Janina Iodka.
Tut, viadoma, niejkaja niestykoŭka. Čamu prybiralščyc zapisali ŭ chakiej? Treba było ŭ kiorlinh!
Čym bližej byŭ zapavietny «piacitysiačny» podpis, tym bolš u śpisie źjaŭlałasia dziŭnych «padpisantaŭ». Prybiralščycy, inžyniery, supracoŭniki MUS. Adznačylisia siarod «apošnich trochsot» i kiraŭniki «Čyžoŭka-Areny»: načalnik achovy Ihar Žoraŭ, namieśniki hiendyrektara Stanisłaŭ Maksimovič, Andrej Karabaniuk i Pavieł Ściapanaŭ, načalnica adździeła arhanizacyi spartyŭnych mierapryjemstvaŭ Taćciana Sokarava.
Siarod padpisantaŭ apynuŭsia navat vieterynarny lekar «HACAR pa prykładnych vidach sportu» Uładzimir Patyłkin (№4222). A žyvioł za što?