Hulnia ŭ dobraha i złoha śledčych
Hetuju hulniu rasijskija pradstaŭniki ŭ čacvier zhulali bliskuča. Piša Jury Drakachrust.
29.05.2009 / 12:03
Hetuju hulniu rasiejskija pradstaŭniki ŭ čacvier zhulali bliskuča.
U kuluarach u razmovie z žurnalistami rasiejski ministar finansaŭ Alaksiej Kudryn nie vybiraŭ słovaŭ, charaktaryzujučy stan ekanomiki sajuznaj dziaržavy.
Jon kazaŭ pra mahčymaść niepłaciežazdolnaści Biełarusi ŭžo praz paŭhoda, pra ŭtrymanskaje staŭleńnie da Rasiei, pra toje, što administracyjny resurs u Biełarusi padaŭlaje rynkavyja mechanizmy, pra toje, što nabirańnie kredytaŭ tolki zahaniaje biełaruskija ekanamičnyja prablemy hłybiej. Słovam Apakalipsis zaŭtra. Da taho ž mienavita Kudryn ahučyŭ rašeńnie Maskvy pačakać z vydačaj apošniaj tranšy kredytu ŭ pamiery 500 miljonaŭ dalaraŭ, i jon ža pryhadaŭ, što i MVF prytrymaŭ vydaču čarhovaj porcyi svajho kredytu.
A potym na scenu vyjšaŭ dobry śledčy – Pucin.
Jon i padčas pieramovaŭ z Łukašenkam kazaŭ niejkija vietlivyja słovy, a na vynikovaj presavaj kanferencyi nibyta abvierh svajho ministra finansaŭ «Niejkija krajnija acenki – niedarečnyja» i «Rasieja, kali spatrebicca, zaŭsiody padstavić plačo Biełarusi».
Heta vidavočnaja hulnia. Kudryn – palityčna adna z samych palityčna blizkich Pucinu asobaŭ u Rasiei.
Niadaŭna prezydent Miadźviedzieŭ publična paraiŭ Kudrynu pašukać inšuju pracu. I što – i ničoha, ministar zastaŭsia na svajoj pasadzie.
Jak ža pračytać hetaje supiarečlivaje pasłańnie? A supiarečnaści niama. Kudryn vykłaŭ ekanamičnuju acenku stanovišča, mahčymy, sapraŭdy, krychu zhuściŭšy farby. A Pucin – skazaŭ pra plačo, namiaknuŭ, što Maskva moža ŭsie hetyja ekanamičnyja vysnovy adkłaści ŭbok i kiravacca inšymi, palityčnymi čyńnikami. Ale nie za tak, zusim nie za tak.
Ja b jašče adznačyŭ toj čyńnik, što ščyravańni Kudryna – davoli mocny ŭdar pa kredytnaj reputacyi Miensku.
Skažy takoje Pucin – heta i adkaznaść, i pramy kanflikt ź biełaruskimi ŭładami. Adnak heta była b acenka palityka. A mała čaho jany havorać. A Kudryn – vielmi aŭtarytetny i pavažany čałaviek va ŭsiaśvietnaj finansavaj supolnaści. I kali , skažam, zaŭtra biełaruskija pradstaŭniki pryjduć prasić kredyt u jaki-niebudź zachodni bank, tam pry abhavorvańni ŭmovaŭ pryhadajuć acenku adnaho z ŭsiaśvietnych finansavych huru, bo kamu jak nie jamu viedać stan spravaŭ u sajuznaj Rasiei dziaržavie. A heta istotna adabjecca i na ŭmovach kredytu i na samaj mahčymaści jaho atrymańnia.
I hetaja hulnia u dobraha i złoha śledčaha vielmi nahadvaje abcuhi, jaki ščylna ściskajucca vakoł Biełarusi.