Darja Palakova z Bresta, jakaja parvała kurtku milicyjanieru, atrymała dva hady chatniaj chimii
Suddzia Leninskaha rajona Bresta Śviatasłaŭ Kalina 19 studzienia abviaściŭ prysud Darji Palakovaj. Žančynu pryznali vinavataj pa artykule 364 Kryminalnaha kodeksa («Hvałt albo pahroza hvałtu ŭ dačynieńni da supracoŭnika orhanaŭ unutranych spraŭ») i pryznačyli pakarańnie ŭ vyhladzie abmiežavańnia voli na termin 2 hady biez nakiravańnia ŭ papraŭčuju ŭstanovu. Taksama sud pastanaviŭ spahnać na karyść paciarpiełaha 10 rubloŭ, a aryšt z bankaŭskich rachunkaŭ Palakovaj źniać.
19.01.2021 / 13:11
Bresckaja hazieta
Na pasiadžeńni 16 studzienia Harunoŭ prynios kurtku, a taksama kvitancyju ab tym, što jaje ramont acenieny majsterniaj u 10 rubloŭ. Prakuror zajaviŭ chadajnictva ab tym, što varta źmianić pazoŭnika z UUS Brestabłvykankama (i škodu na sumu ŭ 104.50 rubloŭ) na paciarpiełaha (i škodu varta aceńvać u 10 rubloŭ) — usie ŭdzielniki pracesu pahadzilisia, suddzia chadajnictva zadavoliŭ, paviedamlaje spring96.org.
Siarod materyjałaŭ spravy, jakija (u adroźnieńnie ad padranaj kurtki) usio ž taki prysutničali ŭ spravie, byli:
- zaklučeńnie ekśpierta ad 26.10.2020, što cialesnych paškodžańniaŭ u Harunova nie vyjaŭlena;
- try videazapisy z padziejami 25.10.2020.
Było prademanstravana videa, dva inšyja, padobna, byli źniatyja staršym milicejskaha naradu na telefon.
Na hetym ža videa suddzia zaŭvažyŭ, što Palakova plaskała ŭ ładki. Pacikaviŭsia, ci za heta abvinavačanaja pryciahvałasia da administracyjnaj adkaznaści. Darja adkazała, što mienavita za heta, sud adbyŭsia 28 kastryčnika 2020 hoda. Suddzia chacieŭ bolš detalaŭ: ci ažyćciaŭlała abvinavačanaja pikietavańnie, albo prymała ŭdzieł u masavym mierapryjemstvie da zatrymańnia jaje znajomaha Alaksandra Sacharuka. Žančyna adkazała, što ničoha padobnaha nie było. Taksama Palakova nahadała, jak raźvivalisia padziei: jana trymała milicyjanta za kurtku, jaje adciahnuli, kurtku jana adpuściła. Zatym znoŭ schapiła za kurtku — i pa videa možna zaŭvažyć, što tady adzieńnie ŭžo była parvanaje. Užo paśla jana zaplaskała ŭ dałoni, i była zatrymanaja.
Dziaržabvinavaŭca Dajneka ŭ chodzie sudovych sprečak prasiŭ pryznać Darju Palakovu vinavataj pa artykule 364 Kryminalnaha kodeksa i pryznačyć pakarańnie ŭ vyhladzie 3 hadoŭ abmiežavańnia voli biez nakiravańnia ŭ papraŭčuju ŭstanovu. Taksama prakuror prasiŭ zadavolić pazoŭ paciarpiełaha na 10 rubloŭ, i źniać aryšt z rachunkaŭ Palakovaj u čatyroch biełaruskich bankach.
Bok abarony adznačaŭ, što ŭ pakazanych materyjałach nie dakazany matyŭ pomsty. Advakatka Darji źviarnuła ŭvahu, što sam paciarpieły pacvierdziŭ, što źbićcia nie było, cialesnych paškodžańniaŭ nie ŭźnikła. A hvałt, kali i mieŭ miesca, pa svaim charaktary było niaznačnym — značyć, i pakarańnie pavinna być adpaviednym, minimalnym. Da źmiakčalnych abstavin advakatka prasiła adnieści toje, što Darja sama vychoŭvaje dvaich dziaciej paśla śmierci muža, taksama na jaje ŭtrymańni pažyłaja maci. Abvinavačanaja maje stanoŭčyja charaktarystyki, pastajannaje miesca žycharstva i pastajannuju pracu. Na asnovie nazvanaha advakat prasiła prymianić artykuł 70 Kryminalnaha kodeksa i pryznačyć bolš miakkaje pakarańnie ŭ vyhladzie štrafu.
Sama abvinavačanaja ŭ svaim apošnim słovie skazała, što šanuje pracu milicyi, bo jaje baćka byŭ supracoŭnikam orhanaŭ unutranych spraŭ. Žančyna adznačyła, što nie chacieła pryčynić fizičny bol milicyjantu. I kali b situacyja paŭtaryłasia, nie stała pieraškadžać dziejańniam milicyjanta.