«Ałkaholem nie pachnie naohuł»: apublikavana rasśledavańnie pa fakcie śmierci Ramana Bandarenki. U tym liku bilinh Natalli Ejsmant

Inicyjatyva BYPOL apublikavała rasśledavańnie pa fakcie śmierci Ramana Bandarenki. Što ŭ im novaha i važnaha? Nazyvajucca proźviščy kankretnych siłavikoŭ, jakija znachodzilisia ŭ toj viečar na płoščy Pieramienaŭ. Taksama publikujecca vypiska ź ich bilinhaŭ, a taksama bilinh Dźmitryja Baskava, Natalli Ejsmant i Hanny Ejsmant. Z dakumientaŭ vynikaje, što ŭsie jany taksama byli na płoščy Pieramienaŭ.

27.01.2021 / 11:57

BYPOL apisvaje stan Ramana pry pastupleńni ŭ addzialeńnie milicyi: jon užo byŭ u ciažkim stanie, nie moh razmaŭlać. Z Centralnaha RUUSa pazvanili ŭ chutkuju dapamohu ŭ 23:04 12 listapada. Dziažurny paviedamiŭ miedykam pra mocna pjanaha čałavieka — takuju infarmacyju jon atrymaŭ ad amapaŭcaŭ, jakija prynieśli Ramana Bandarenku.

Ale ŭžo ŭ nastupnym zvanku milicyjanier udakładniaje, što pachu ałkaholu niama zusim.

Miedyki zabrali Bandarenku ŭ krytyčnym stanie i nie mahli rabić paŭnavartasnuju apieracyju, bo jon by jaje nie pieranios.

Z apublikavanych materyjałaŭ vynikaje, što pryčynaj śmierci Ramana Bandarenki stała «traŭmatyčnaje subduralnaje krovaźlićcio».