У Віцебску за выкарыстанне балончыка супраць сілавікоў пракурор просіць шэсць гадоў калоніі

У судзе Кастрычніцкага раёна Віцебска 3 лютага адбылося чарговае пасяджэнне па крымінальнай справе Арцёма Ісакава. Яго абвінавачваюць паводле арт. 364 КК («Гвалт або пагроза ўжывання гвалту ў дачыненні да супрацоўніка ўнутраных спраў»), паведамляе spring96.org.

03.02.2021 / 15:23

spring96.org

Справу разглядае суддзя Сяргей Будрэвіч.

Па справе праходзяць дзевяць пацярпелых супрацоўнікаў міліцыі, якія на ранейшых пасяджэннях давалі свае паказанні. Ісакава абвінавачваюць ва ўжыванні пярцовага балончыку ў дачыненні да вышэйзгаданых супрацоўнікаў МУС.

Арцём Ісакаў быў затрыманы 25 кастрычніка ў межах адміністрацыйнага разбіральніцтва. За парушэнне закону аб масавых мерапрыемствах яго аштрафавалі на 10 базавых велічыняў. У межах крымінальнай справы знаходзіцца ў СІЗА ад 28 кастрычніка.

Сёння ў судзе адбыліся спрэчкі бакоў.

Дзяржаўная абвінаваўца Крысціна Мацвеева запрасіла для Арцёма Ісакава 6 гадоў пазбаўлення волі.

Прысуд будзе абвешчаны 4 лютага.