U Navahrudku asudzili na 10 sutak miascovuju žycharku za ŭdzieł u ekskursii pra Chałakost
U Navahradku asudzili na 10 sutak miascovuju žycharku Žannu Babroŭskuju za ŭdzieł u ekskursii, jakaja prachodziła ŭ rajcentry 24 studzienia. Pry hetym ekskursija była aficyjna apłačana ŭ miascovym muziei, udzieł u joj brali kala 20 čałaviek, histaryčnyja fakty raspaviadaŭ ciertyfikavany hid. U toj dzień žančynu nie zatrymlivali, na jaje skłali pratakoł, kali jana pajšła ŭ milicyju pa inšaj spravie. Sud paličyŭ, što jana praviała 24 studzienia adzinočny niesankcyjanavany pikiet, raspaviali Tut.by miascovyja žychary.
09.02.2021 / 12:22
Fota Kaciaryny Hardziejevaj
Praktyčna kožnuju niadzielu žychary Navahrudka chodziać na ekskursii. Miascovyja kažuć, što i na hetych mierapryjemstvach ich pastajanna supravadžajuć supracoŭniki milicyi.
24 studzienia ŭ rajonnym centry prachodziła ekskursija, pryśviečanaja historyi Chałakosta. Niekatoryja ŭdzielniki prymacavali da svajoj vopratki žoŭtyja zorki z nadpisam «23.34».
— Chtości sfatahrafavaŭ hetuju ekskursiju — i zdymak źjaviŭsia ŭ adnym z telehram-kanałaŭ. Ekskursija prajšła biez ekscesaŭ. Žanna išła dzieści zzadu, bo była paśla chvaroby, joj było składana chutka pierasoŭvacca. Karaciej, dzieści tam «cielapałasia», jak my žartavali. Byccam by na vopratcy ŭ jaje taksama była zorka. Adnak ni fihura, ni ličby ŭ nas jašče nie zabaronienyja, zdajecca. Tady ŭ piešaj ekskursii ŭdzielničała kala 20 čałaviek, prahułka doŭžyłasia prykładna dźvie hadziny, nikoha nie zatrymlivali, zaŭvah nikomu nie rabili, milicyjanty tolki nazirali — raspaviadajuć miascovyja žychary.
Žanna tady nie była zatrymanaja, pratakoł u milicyi na jaje skłali 27 studzienia, kali jana pryjšła ŭ miascovaje adździaleńnie pa inšaj spravie.
— Sprava ŭ tym, što ŭ navahodniuju noč jana była na płoščy, i namieśnik načalnika našaj milicyi hučna kamuści skazaŭ, što, maŭlaŭ, vuń taja, jakaja chvareje ciapier na karanavirus. Heta čuli mnohija. Žanna i praŭda chvareła, ale raniej — i vyjšła na vulicu ŭžo paśla chvaroby i abaviazkovaj samaizalacyi. Jana aburyłasia, što takim čynam raspaŭsiudžvajucca źviestki pra jaje zdaroŭje, a heta miedycynskaja tajamnica. Chtości ź milicyjantaŭ skazaŭ joj: «Tak napišycie zajavu». Jana heta i zrabiła. U milicyju jaje vyklikali mienavita pa hetaj spravie, ale skłali pratakoł z nahody nibyta praviedzienaha pikietu padčas ekskursii, — raspaviadajuć miascovyja žychary.
8 lutaha adbyłosia sudovaje pasiadžeńnie pa hetaj administracyjnaj spravie — i Žanie dali 10 sutak aryštu za niesankcyjanavany pikiet.
— Jaje adrazu ž pavieźli ŭ Kareličy, — raspaviadajuć miascovyja.
Žančyna raniej užo była asudžanaja ŭsio pa tym ža artykule 23.34 KaAP: u kastryčniku, u Dzień maci, vyjšła na hałoŭnuju płošču z płakatam. Tady jana adsiedzieła 5 sutak u Karelickim SIZA.
Taksama pavodle infarmacyi haradzienskich pravaabaroncaŭ dniami asudzili jašče adnaho miascovaha žychara — Viktara Mackieviča. Mužčyna atrymaŭ 10 sutak za niesankcyjanavany pikiet: jon raźmiaściŭ BČB-ściah z hierbam «Pahonia» ŭ aknie svajoj kvatery.
Darečy, 31 studzienia padčas čarhovaj haradskoj niadzielnaj ekskursii ŭ Navahradku zatrymlivali siertyfikavanaha ekskursavoda i stvaralnicu Muzieja habrejskaha supracivu ŭ rajonnym centry, a taksama supracoŭnicu Navahrudskaha historyka-krajaznaŭčaha muzieja Tamaru Viaršyckuju. Paśla apytańnia ŭ milicyi jaje adpuścili, ale ekskursiju i prahlad filma pra Chałakost pryjšłosia zharnuć. Taksama ŭ RAUS dastavili byłoha dyrektara miascovaj himnazii 72-hadovaha Alaksandra Bystryka. Jaho zabrali ŭ centry horada. Mužčyna na ekskursiju tak i nie dajšoŭ. Potym u jaho doma supracoŭniki milicyi praviali ahlad.