Rasśledavańnie: supracoŭniki FSB, jakija atrucili Navalnaha, datyčnyja da dvuch atručvańniaŭ rasijskaha žurnalista

Hrupa supracoŭnikaŭ FSB, jakaja, jak miarkujecca, arhanizavała atručvańnie palityka Alaksieja Navalnaha i jašče niekalkich čałaviek, taksama zrabiła dźvie sproby atrucić žurnalista i palityka Uładzimira Kara-Murzu ŭ 2015 i 2017 hadach. Da takoj vysnovy pryjšli aŭtary novaha rasśledavańnia Bellingcat i The Insider, jakija vyjavili, što supracoŭniki FSB sačyli za Kara-Murzoj u jaho pajezdkach.

11.02.2021 / 18:29

Jak vyśvietlili śledčyja, supracoŭniki FSB pačali sačyć za Kara-Murzoj u jaho pajezdkach za try miesiacy da pieršaha atručvańnia, što zdaryłasia ŭ mai 2015 hoda. Razam ź im za hety čas jany naviedali Tomsk, Sankt-Pieciarburh, Kalininhrad i Kazań.

Kara-Murza adčuŭ siabie drenna praz dvoje sutak paśla viartańnia ŭ Maskvu z Kazani.

Taksama cikava, što Kara-Murza płanavaŭ lacieć na kruhły stoł u Kalininhrad 27 maja — i palacieŭ by, kali b 26 maja nie byŭ atručany. Efesbešniki, jakija išli za Uładzimiram va ŭsich papiarednich pajezdkach, kvitki ŭ Kalininhrad navat nie braniravali.

Paśla špitalizacyi Kara-Murzu pastavili dyjahnaz «sardečnaja niedastatkovaść».

Druhi raz Kara-Murza byŭ atručany 2 lutaha 2017 hoda. U rasśledavańni nie pryvodzicca pacvierdžańniaŭ taho, što ŭ dni, jakija niepasredna papiaredničali atručvańniu, pobač ź im znachodzilisia supracoŭniki FSB. Aŭtary rasśledavańnia, adnak, vykazali zdahadku, što jad moh być naniesieny na zubnuju ščotku.

Nashaniva.com