Ekśpierty: ftałaty ŭ płastyku drenna ŭpłyvajuć na dziciačy mozh i pavinny być zabaronienyja

Sintetyčnyja chimičnyja rečyvy pad nazvaj «ftałaty» škodziać raźvićciu dziciačaha mozhu, tamu ich vykarystańnie ŭ spažyvieckich praduktach pavinna być jak maha chutčej zabaroniena. Pra heta papiaredžvaje amierykanskaje abjadnańnie navukoŭcaŭ i miedykaŭ pad nazvaj Project TENDR.

25.02.2021 / 10:02

Fota Depositphotos.com

Project TENDR — heta supołka navukoŭcaŭ-vałancioraŭ, miedykaŭ i abaroncaŭ pravoŭ dziaciej, što vyvučajuć upłyŭ niejrataksičnych chimikataŭ na dziaciej.

Ftałaty zvyčajna dadajuć u spažyvieckija tavary, kab zrabić płastyk bolš hnutkim i tryvałym. Jany ŭvachodziać u skład myjnych srodkaŭ, mebli, upakoŭki dla ježy, aŭtamabilnych płastmas, klejaŭ i šmatlikich inšych praduktaŭ, u tym liku šampuniaŭ, myła i łaka dla paznohciaŭ.

Navukoŭcy miarkujuć, što ftałaty vyklikajuć u dziaciej atłuścieńnie, astmu, sardečna-sasudzistyja chvaroby, rak i chvaroby repraduktyŭnaj sistemy, paviedamlaje CNN.

Jak śviedčyć Project TENDR, vykarystańnie ftałataŭ moža być źviazanaje z doŭhačasovaj škodaj raźvićciu mozhu padčas embryjanalnaha pieryjadu raźvićcia i ŭ dziacinstvie.

Najbolš vyražanaja suviaź była vyjaŭlenaja pamiž ftałatami i hipieraktyŭnaściu, ahresijaj, emacyjnaj uzbudžalnaściu, i inšymi simptomami sindromu deficytu ŭvahi i hipieraktyŭnaści. Taksama vučonyja znajšli suviaź pamiž vykarystańniem praduktaŭ z ftałatami i paharšeńniem pamiaci i intelektu.

Pa mierkavańni navukoŭcaŭ, varta całkam pazbavicca ad vykarystańnia ftałataŭ luboha typu ŭ praduktach, jakimi karystajucca ciažarnyja žančyny, žančyny repraduktyŭnaha ŭzrostu i dzieci.

Admova ad ftałataŭ, adnak, moža pryvieści da pavyšeńnia koštu praduktaŭ.