Na pasiadžeńni Mižnarodnaha alimpijskaha kamiteta nie było pryniata rašeńniaŭ nakont Biełarusi

Brytanskaje vydańnie Inside the Games śćviardžała, što na pasiadžeńni vykankama Mižnarodnaha alimpijskaha kamiteta (MAK) 24 lutaha budzie abmiarkoŭvacca pytańnie nakont sankcyj u dačynieńni da Nacyjanalnaha alimpijskaha kamiteta Biełarusi z-za represij biełaruskich spartśmienaŭ. Ale, vidać, jaho nie było, piša Tut.by.

25.02.2021 / 07:39

Tomas Bach. Fota MAK

Na pres-kanfierencyi paśla pasiadžeńnia kiraŭnik MAK Tomas Bach nie zakranuŭ biełaruskaha pytańnia padčas asnoŭnaj siesii. Tym nie mienš paśla jaje adnym z žurnalistaŭ było zadadzienaje pytańnie ab tym, jak moža źmianicca situacyja vakoł NAK Biełarusi paśla vybaraŭ u im (pasiadžeńnie NAK u Minsku, miarkujecca, projdzie ŭžo 26 lutaha).

— My ŭvažliva sočym za situacyjaj, i ja nie budu ciapier śpiekulavać nakont vynikaŭ vybaraŭ u NAK. Budziem čakać vyniku, i tady budzie samy čas abmierkavać hetaje pytańnie, — adkazaŭ Bach.

Inside the Games paviedamlała, što kali vykankam MAK vyrašyć, što spartśmieny, jakija pratestujuć suprać Łukašenki, pa-raniejšamu padviarhajucca dyskryminacyi, mohuć być pryniaty dalejšyja miery, u tym liku adchileńnie Nacyjanalnaha alimpijskaha kamiteta i vystup biełaruskich spartśmienaŭ na spabornictvach u Tokia pad niejtralnym alimpijskim ściaham.