«Heta ludažerstva!» U Homieli Anastasii Pieravoščykavaj, jakaja siadzić 90 sutak, dadali jašče 15

Maci 30-hadovaj žycharki Homla Anastasii Pieravoščykavaj daviedałasia ź lista ad dački, što joj dadali jašče 15 sutak. «Ja ŭ adčai. Heta ludažerstva!» — płača jaje maci Alena Micina, piša Radyjo Svaboda.

10.03.2021 / 18:07

Dačka napisała Alenie Micinaj, što ŭ jaje byŭ čarhovy tajemny sud. Joj dadali jašče 15 sutak da tych 90, jakija byli raniej pryznačanyja sudom. Anastasija była asudžanaja na 15 dzion aryštu ŭžo šeść razoŭ. Ciapier — siomy.

«Vyjdzie na Dzień Pieramohi. Budzie «padarunak» jaje dziadulu, veteranu vajny, jaki čakaje ŭnučku z turmy i kazaŭ, što toje, što adbyvajecca ciapier, — fašyzm», — dadała maci.

Raniej jana raskazvała Svabodzie, jak milicyjant z Navabielickaha RAUS zajaviŭ, što «bolš niama na kaho viešać, aproč jaje, bo ŭ niekatorych dzieci, a inšyja źjechali za miažu». «Tak jon patłumačyŭ toje, što Naściu čarhovy raz pakarali aryštam», — raskazvała ŭ lutym Alena.

Anastasiju sudziać, pavodle maci, za niejkija zdymki ź bieł-čyrvona-biełym ściaham i praz pakazańni čałavieka, jaki śćviardžaje, što dziaŭčyna ŭdzielničała ŭ «partyzaninhu».

«U mianie doma i ŭ dzieda Naści, veterana, pravodzili pieratrusy. 6 lutaha dačka vyjšła ź pieršych 15 sutak, a 8 lutaha jaje znoŭ zabrali, i z taho času tolki dadajuć čarhovyja sutki! Jaje dapytvali ŭ milicyi: «Kaho ty viedaješ, daj pakazańni na inšych, zdaj rajonny ściah». Ale kali jana nia viedaje, dzie ściah? Kali jana nia viedaje, chto tyja ludzi, jakija stajali sa ściahami? Jana nia moža zdać ludziej milicyjantu, bo nia viedaje ich, a jon złujecca! I daje čarhovyja sutki», — kazała maci.

«Navat nie mahu ŭjavić — za što znoŭ jaje sudzili… Pieradačy biaruć cieraz raz, i nia ŭsio. Listy nie dachodziać da jaje. Choć ja viedaju, što šmat ludziej piša joj», — dadała Alena Micina.

Dniami Pieravoščykavu pieraviali adbyvać pakarańnie ŭ Buda-Kašalova. U miascovym izalatary žorstkija ŭmovy i niama prybiralni, tolki viadro,— pra heta paviedamlali ludzi, jakija tam siadzieli,— Natalla Susłava i Ihar Kraŭčanka.