За слова «скаты» пад фота міліцыянераў цяжарная жанчына атрымала 1,5 гады хатняй хіміі

У судзе Фрунзенскага раёна г. Мінска 10 сакавіка пачаўся судовы працэс над жанчынай, якую абвінавачвалі ў публічнай абразе прадстаўніка ўлады ў сувязі з выкананнем ім службовых абавязкаў (арт. 369 Крымінальнага кодэкса). Справу разглядаў суддзя Андрэй Млечка, паведамляюць праваабаронцы.

11.03.2021 / 16:58

Згодна з абвінавачваннем, жанчына наўмысна 16 ліпеня 2020 года з дапамогай мабільнага тэлефона змясціла каментар у сацыяльнай сетцы «УКантакце» ў групе «Мая краіна Беларусь» на адрас старшага інспектара УУС Пружанскага райвыканкама Сяргея Каляды і ўчастковага інспектара таго ж УУС Тарасевіча, якія выконвалі свае службовыя абавязкі, напісала слова «скаты».

Віну абвінавачаная прызнала часткова.

Жанчына знаходзіцца на чацвёртым месяцы цяжарнасці.

Раніцай 11 сакавіка суддзя Андрэй Млечка падтрымаў пазіцыю дзяржабвінавачвання і агаласіў прысуд — прызнаць жанчыну вінаватай, асудзіць яе да 1 года і 6 месяцаў абмежавання волі без накіравання ў папраўчую ўстанову, а таксама спагнаць з яе на карысць пацярпелых кампенсацыю маральнай шкоды — 1000 рублёў кожнаму і дзяржпошліну ў памеры 174 рублёў.