ЕС не пабачыў прычын забараняць вакцыну AstraZeneca

Еўрапейскае агенцтва лекавых сродкаў (EMA) не валодае на гэты момант доказамі таго, што вакцына ад COVID-19 брытанска-шведскага канцэрна AstraZeneca і Оксфардскага універсітэта можа выклікаць захворванне на трамбоз. Пра гэта заявіла кіраўнік EMA Эмер Кук на прэс-канферэнцыі ў аўторак, 16 сакавіка, піша Deutsche Welle.

17.03.2021 / 07:27

Як адзначыла Эмер Кук, колькасць выпадкаў праявы такіх пабочных эфектаў невялікая ў параўнанні з агульнай колькасцю прышчэпленых і перавагі прэпарата перавышаюць рызыкі.

Кіраўнік EMA адзначыла, што выпадкі захворвання на трамбоз былі выяўленыя не ў часе клінічных выпрабаванняў вакцыны і не лічацца ў спісе яе магчымых пабочных эфектаў.

Камітэт EMA па бяспецы вакцын раней днём абмеркаваў выпадкі трамбозу пасля прышчэпкі AstraZeneca і мае намер падаць свае заключныя высновы да спецыяльнага пасяджэння, прызначанага на 18 сакавіка.

Эксперты EMA «пракансультуюць нас з нагоды таго, ці павінны быць прыняты ў далейшым якія-небудзь меры», патлумачыла Кук.