Каб зняць пытанні да сябе, Пашынян прызначыў датэрміновыя выбары на чэрвень
Пазачарговыя парламенцкія выбары ў Арменіі пройдуць 20 чэрвеня, заявіў у Facebook прэм'ер-міністр Рэспублікі Нікол Пашынян, піша РБК.
18.03.2021 / 14:47
«Сёння адбылася мая сустрэча з кіраўніком [апазіцыйнай] фракцыі «Квітнеючая Арменія» Гагікам Царукянам. На сустрэчы мы зафіксавалі, што лепшы выхад з унутрыпалітычнай сітуацыі — гэта пазачарговыя парламенцкія выбары», — напісаў ён.
У прыняцці рашэння прэм'ер-міністр таксама абапіраўся на абмеркаванні пытання з прэзідэнтам Арменіі Арменам Саркісянам, кіруючай парламенцкай фракцыяй «Мой крок» і кіраўніком апазіцыйнай парламенцкай фракцыі «Светлая Арменія» Эдмонам Марукянам, гаворыцца ў пасце.
У канцы лютага ў Арменіі пачаўся новы віток палітычнага крызісу. Пашынян, якога апазіцыя неаднаразова абвінавачвала ў паразе ў Нагорным Карабаху, звольніў намесніка кіраўніка, а затым і кіраўніка Генштаба. Пасля звальненняў у Генштабе вайскоўцы запатрабавалі адстаўкі Пашыняна. Ён, у сваю чаргу, прапанаваў датэрміновыя парламенцкія выбары, аднак апазіцыя выступіла супраць іх правядзення ва ўмовах знаходжання Пашыняна ва ўладзе.