Ізраільская кампанія Cellebrite адмовілася прадаваць тэхналогіі па ўзломе тэлефонаў у Беларусь
Яна зрабіла гэтую заяву пасля абвінавачванняў праваабаронцаў, што яе прадукты выкарыстоўваліся для пераследу апазіцыі.
19.03.2021 / 10:23
Ізраільская кампанія Cellebrite абвясціла, што больш не будзе прадаваць свае тэхналогіі ў Беларусь і Расію. Яна зрабіла гэтую заяву пасля абвінавачванняў праваабаронцаў, што яе прадукты выкарыстоўваліся для пераследу апазіцыі і меншасцяў у гэтых краінах. Пра гэта піша Tut.by са спасылкай на Haaretz.
Юрыст і праваабаронца Эйтай Мак разам з 80 актывістамі-праваабаронцамі раскрыў дакументы, якія звязваюць тэхналогію Cellebrite з пераследам меншасцяў, а таксама палітычных дзеячаў (у прыватнасці, у дакументах згадваецца Любоў Собаль, юрыст Фонду барацьбы з карупцыяй, які ўзначальвае Аляксей Навальны) у Расіі і Беларусі.
Пасля таго, як дакументы былі апублікаваныя, Cellebrite спыніла экспарт сваіх тэхналогій у Беларусь і Расію. У мінулым кампанія не пацвярджала продаж тэхналогій нашай краіне, хоць інфармацыя аб яе прадукцыі з'яўлялася на сайце дзяржзакупак Беларусі.
Скрыншот з сайта icetrade.by
У адказ на апублікаваныя дакументы і запыт Haaretz генеральны дырэктар Cellebrite Ёсі Карміл абвясціў аб пераглядзе палітыкі кампаніі.
«У рамках нашых стандартных бізнэс-аперацый мы рэгулярна пераглядаем і абнаўляем нашу палітыку па нарматыўна-прававой адпаведнасці, каб гарантаваць, што мы працуем у адпаведнасці з прынятымі міжнароднымі правіламі і палажэннямі, — паведаміў ён. — Cellebrite дае праваахоўным органам і арганізацыям магчымасць зрабіць наша грамадства больш бяспечным, падаючы рашэнні, якія дапамагаюць законным чынам атрымліваць лічбавыя доказы ў часе крымінальных расследаванняў і грамадзянскага судаводства».