Izrailskaja kampanija Cellebrite admoviłasia pradavać technałohii pa ŭzłomie telefonaŭ u Biełaruś
Jana zrabiła hetuju zajavu paśla abvinavačvańniaŭ pravaabaroncaŭ, što jaje pradukty vykarystoŭvalisia dla pieraśledu apazicyi.
19.03.2021 / 10:23
Izrailskaja kampanija Cellebrite abviaściła, što bolš nie budzie pradavać svaje technałohii ŭ Biełaruś i Rasiju. Jana zrabiła hetuju zajavu paśla abvinavačvańniaŭ pravaabaroncaŭ, što jaje pradukty vykarystoŭvalisia dla pieraśledu apazicyi i mienšaściaŭ u hetych krainach. Pra heta piša Tut.by sa spasyłkaj na Haaretz.
Juryst i pravaabaronca Ejtaj Mak razam z 80 aktyvistami-pravaabaroncami raskryŭ dakumienty, jakija źviazvajuć technałohiju Cellebrite ź pieraśledam mienšaściaŭ, a taksama palityčnych dziejačaŭ (u pryvatnaści, u dakumientach zhadvajecca Luboŭ Sobal, juryst Fondu baraćby z karupcyjaj, jaki ŭznačalvaje Alaksiej Navalny) u Rasii i Biełarusi.
Paśla taho, jak dakumienty byli apublikavanyja, Cellebrite spyniła ekspart svaich technałohij u Biełaruś i Rasiju. U minułym kampanija nie paćviardžała prodaž technałohij našaj krainie, choć infarmacyja ab jaje pradukcyi źjaŭlałasia na sajcie dziaržzakupak Biełarusi.
Skrynšot z sajta icetrade.by
U adkaz na apublikavanyja dakumienty i zapyt Haaretz hienieralny dyrektar Cellebrite Josi Karmił abviaściŭ ab pierahladzie palityki kampanii.
«U ramkach našych standartnych biznes-apieracyj my rehularna pierahladajem i abnaŭlajem našu palityku pa narmatyŭna-pravavoj adpaviednaści, kab harantavać, što my pracujem u adpaviednaści z pryniatymi mižnarodnymi praviłami i pałažeńniami, — paviedamiŭ jon. — Cellebrite daje pravaachoŭnym orhanam i arhanizacyjam mahčymaść zrabić naša hramadstva bolš biaśpiečnym, padajučy rašeńni, jakija dapamahajuć zakonnym čynam atrymlivać ličbavyja dokazy ŭ časie kryminalnych rasśledavańniaŭ i hramadzianskaha sudavodstva».