Ці паедзе Румас на работу ў Маскву? Выглядае, што яшчэ не ведае сам
Былы прэм'ер Сяргей Румас вылучаны кандыдатам у назіральную раду Рассельгасбанка, адпаведны спіс кандыдатаў падпісаў расійскі прэм'ер-міністр Міхаіл Мішусцін. Але ці варта чакаць ад'езду Румаса ў Маскву? Гэтае пытанне пакуль выглядае нявырашаным.
23.03.2021 / 10:34
Сяргей Румас, фота Сяргея Гудзіліна
Як стала вядома «Нашай Ніве» ад крыніц у акружэнні Румаса, гэта прызначэнне ўзгаднялася яшчэ восенню, да эміграцыі былога прэм'ер-міністра. Але асаблівасць бюракратыі ў тым, што працэс расцягнуўся амаль на паўгода.
Чытайце таксама: Стала вядома, дзе знаходзіцца Сяргей Румас і ў чым сэнс прэтэнзій да яго
Румас з Лондана: Я жывы, не арыштаваны. Дзякуй, што хвалюецеся
Уключэнне ў спіс назіральнай рады не патрабуе штодзённай працы, хутчэй, гэта кансультатыўная нагрузка, якая ў банкаўскай сферы традыцыйна высока аплачваецца.
Цяперашняе рашэнне стала нечаканасцю для Румаса, які раздумвае, ці варта аддаваць цяпер сябе ў рукі рускіх, якія ва ўмовах заведзенай крымінальнай справы ў Беларусі могуць распарадзіцца яго лёсам згодна са сваімі, а не ягонымі інтарэсамі.
Сам Румас сітуацыю не каментуе.
Калі ён пагодзіцца на атрыманне пасады, а Мінск палічыць гэта своеасаблівым запрашэннем на палітычныя «агледзіны», то можна чакаць хвалю дыскрэдытацыі былога прэм'ера і раздзьмухвання пакуль што ціхай «справы сяброў Румаса».