Mastak Aleś Puškin, suprać jakoha zaviali kryminalnuju spravu «za nacyzm», viarnuŭsia na radzimu
Mastak prylacieŭ z Kijeva ŭ Minsk viačernim rejsam 26 sakavika.
27.03.2021 / 09:11
U Kijevie Puškin braŭ udzieł u vystavie biełaruskich mastakoŭ «Kožny dzień. Mastactva, salidarnaść, supraciŭ», jakaja prachodzić u Mastackim arsienale, adnoj z najbujniejšych kulturnych placovak va Ukrainie, piša «Radyjo Svaboda».
Pierad vyletam z Kijeva Aleś Puškin viedaŭ, što suprać jaho prakuraturaj Horadni zaviedzienaja kryminalnaja sprava za «reabilitacyju i apraŭdańnie nacyzmu» (častka 3 artykuła 130 Kryminalnaha kodeksa Biełarusi). Ale jon nie razhladaŭ varyjantu zastavacca va Ukrainie i viarnuŭsia na radzimu.
Sprava datyčyć karciny aŭtarstva Puškina, jakaja była na vystavie ŭ Hrodnie. Pa hetaj ža spravie ŭ piatnicu ŭ Hrodnie byŭ zatrymany Pavał Mažejka — stvaralnik Centra haradskoha žyćcia, dzie i adbyłasia vystava.
Spačatku paviedamlałasia, što Puškin pa viartańni ŭ Minsk byŭ zatrymany, ale potym stała viadoma, što jon na voli i skiravaŭsia ŭ Bobr, dzie žyvie.