Tehieran: Dziesiatki tysiač na vulicach
Dadałosia videa
Palityčny ziemlatrus u Iranie. Niahledziačy na zabaronu ŭładaŭ, śviet narodu vyjšła na manifiestacyi suprać režymu Achmadzinedžada i Chamenei.
15.06.2009 / 18:34
Palityčny ziemlatrus u Iranie. Niahledziačy na zabaronu ŭładaŭ, śviet narodu vyjšła na manifiestacyi suprać režymu Achmadzinedžada i Chamenei.
Musavi siarod udzielnikaŭ mitynhu.
Foty z Tehieranu traplajuć u internet praz błohi.
Niadziela prajšła ŭ sutyčkach moładzi z palicyjaj.
Prysutnyja na manifiestacyi karespandenty ahienctva Frans Pres i VVS paviedamlajuć, što na vulicy Tehieranu ŭ paniadziełak vyjšli sotni tysiač, a moža navat miljony ludziej. Jany skandujuć: «Ałłach akbar». Adbyłasia najbolšaja demanstracyja za ŭvieś čas isnavańnia Isłamskaj respubliki. Da manifiestantaŭ dałučyŭsia i kandydat u prezidenty krainy, były premjer-ministr Mirchasejn Musavi.
Ułady rabili ŭsio, kab sarvać vystup apazicyi. Praca internetu ŭ krainie była zamarudžanaja. Unačy śpiecsłužby aryštavali amal 150 studentaŭ, prychilnikaŭ apazicyi. Va ŭniviersiteckim haradku — asnoŭnaj bazie apazicyi, jany razhramili siadziby niezaležnych arhanizacyj. U krainie hłušacca tranślacyja zamiežnych stancyj, jakija nadajuć na farsi.
Niahledziačy na heta, u paniadziełak praciŭniki isnaha ładu zapoŭnili centralnyja vulicy stalicy. Vializnaja ludskaja raka try hadziny płyła ad płoščy Revalucyi da płoščy Svabody ŭ Tehieranie. Kałona raściahnułasia na šeść kiłamietraŭ. Pavodle naziralnikaŭ, heta była najbolšaja demanstracyja ad časoŭ Isłamskaj revalucyi. U adroźnieńnie ad šumnych demanstracyj u studenckim haradku, vialiki marš prachodziŭ pieravažna moŭčki, amal u poŭnaj cišyni. Takoje było rašeńnie arhanizataraŭ.
Kiraŭnictva Hiermanii, Francyi i Brytanii prademanstravała svaju salidarnaść z pratestoŭcami.
Musavi pieršy raz za dva dni źjaviŭsia na ludziach i pakul niajasna, jaki jahony płan dziejańniaŭ. Pieršy vynik pratestaŭ — acenka sumlennaści prezidenckich vybaraŭ pieradadzienaja na razhlad radzie vartaŭnikoŭ isłamskaj revalucyi, najvyšejšamu daradčamu orhanu, što składajecca z mułaŭ i sudździaŭ. Adnak siłavyja struktury zastajucca pad kantrolem Achmadziniedžada, a narodnyja masy — pad upłyvam prapahandy dziaržaŭnaha TV.
Pavodle aficyjnych vynikaŭ hałasavańnia, Musavi apiaredziŭ Achmadziniedžada tolki ŭ stalicy i ŭ rehijonach, nasielenych nacyjanalnymi mienšaściami (Kurdystan, Azierbajdžan, Biełudžystan).
Videa i foty z krainy prabivajucca za miažu dziakujučy Internetu — pratestoŭcy vykarystoŭvajuć flickr.com i twitpic.com. Źjavilisia foty i roliki ź mitynhaŭ u inšych haradach Iranu — Isfachanie, Miešchiedzie, Šyrazie.
Nastupnaja vialikaja demanstracyja zapłanavanaja na aŭtorak.
* * *
Kamientar Redakcyi
My, biełarusy, viedajem, što takoje manipulacyja hramadskaj dumkaj praź ŚMI i što takoje abaviazkovaja dziaržaŭnaja ideałohija. Nam lohka zrazumieć matyvy, jakija kirujuć prychilnikami iranskaj apazicyi.U Iranie maje miesca takoje ž sutyknieńnie demakratyčnaj i aŭtarytarnaj madelaŭ kiravańnia, jak i na postavieckaj prastory.
Achmadziniedžad — kiraŭnik taho ž typu, što i Łukašenka, Čaves i Muhabe. Jon pryjšoŭ da ŭłady na papulisckaj prahramie i hruntavaŭ dalejšuju papularnaść na masavym pramyvańni mazhoŭ i zadzirańni z Zachadam. Ichnaja rytoryka adnolkavaja da bolu: usie, chto suprać ich, heta «admarozki, jakija adpracoŭvajuć hranty». Iranski harłachvat jašče j źniasłaviŭ svajo imia admaŭleńniem Chałakostu (za jakim staić varjackaja praha novaha Chałakostu), tak jak Łukašenka nazaŭždy budzie asacyjavacca z vykazvańniem pra «nie ŭsio tolki kiepskaje ŭ Hitleru».
Ajatała Chamenei i Achmadziniedžad praciahvajuć svaje niebiaśpiečnyja mary pra suśvietnaje panavańnie isłamu ŭ jaho šyickim varyjancie.
Musavi — taki ž prychilnik pabudovy krainy ŭ adpaviednaści z nacyjanalnymi i relihijnymi tradycyjami, jak i jahony apanient. Adnak jon i prychilnyja da jaho ajatoły naležać chutčej da musulmanskaha varyjantu jeŭrapiejskaj «chryścijanskaj demakratyi». Vakoł jaho źjadnałasia niezaležnaje hramadstva Iranu, što ŭžo samo saboj jość znakam.
Pieramahčy papulizm, uzbrojeny elektronnymi ŚMI i jaki nie vahajecca ŭžyvać siłu, niaprosta. Heta patrabuje i śmiełaści, i arhanizatarskich zdolnaściaŭ, i prosta ŭdačy. Vynik tehieranskich manifiestacyj niapeŭny. My ŭ svaich dumkach — z tymi, chto kinuŭ vyklik niavoli. Našy simpatyi — ź iranskimi studentami, a nie z basidžami.