Праваабаронца Таццяна Гацура-Яворская афіцыйна затрыманая па крымінальнай справе

Пра гэта Радыё Свабода паведаміў муж Таццяны Уладзімір Яворскі. У чацвер над усімі затрыманымі актывісткамі «Звяна» прайшлі адміністрацыйныя працэсы.

09.04.2021 / 08:30

Human Constanta

Заснавальніцу грамадскага аб’яднання «Звяно» і адну з арганізатарак выставы «Машына дыхае, а я — не» Таццяну Гацуру-Яворскую затрымалі 6 красавіка.

Напярэдадні супрацоўнікі ДФР правялі ператрусы ў офісе арганізацыі, а таксама ў кватэры і на лецішчы Таццяны. Следчыя дзеянні праводзіліся ў межах справы па артыкуле 293 Крымінальнага кодэкса — фінансаванне або матэрыяльнае забеспячэнне беспарадкаў.

За дзень да затрымання Таццяны Гацуры-Яворскай сілавікі правялі ператрусы яшчэ ў дзвюх арганізатарак выставы «Машына дыхае, а я — не» — Наталлі Трэнінай і Юліі Сяменчанка. Абедзве яны зараз таксама за кратамі.

У чацвер над затрыманымі актывісткамі прайшлі адміністратыўныя працэсы. Трое з іх атрымалі штрафы, у тым ліку Таццяна Гацура-Яворская. Акрамя штрафу Таццяне таксама выставілі абвінавачванне па крымінальным артыкуле.

«Усіх затрыманых актывістак «Звяна» судзілі па адміністрацыйных справах, у тым ліку Таццяну, — расказаў Уладзімір. — Таццяне далі штраф, 50 базавых і маглі выпусціць. Мы чакалі ля ІЧУ. У выніку адвакат сказала, што ў Таццяны іншы статус, яна затрыманая па крымінальнай справе. Што гэта за справа канкрэтна, мы пакуль не ведаем. Ахова ІЧУ не паведамляла дэталяў. Агулам сёння судзілі пяць затрыманых. Аднаго чалавека адпусцілі са штрафам, яшчэ траім далі па сем сутак, яны будуць пад вартай да панядзелка. Усіх прызналі вінаватымі ў непадпарадкаванні супрацоўнікам праваахоўных органаў».