Патрыярх Кірыл: Заразіцца каранавірусам праз прычасце немагчыма
Руская праваслаўная царква (РПЦ) не сумняецца ў тым, што заразіцца каранавірусам праз святыя дары падчас прычасця немагчыма, сказаў патрыярх маскоўскі Кірыл у аўторак на пасяджэнні Сінода РПЦ, піша ТАСС.
13.04.2021 / 17:42
Раней старшыня Аддзела знешніх царкоўных сувязяў (АЗЦС) Маскоўскага патрыярхата мітрапаліт Валакаламскі Іларыён (Алфееў) заклікаў вернікаў не баяцца прычашчацца падчас пандэміі. Прыгатаваныя для прычасця хлеб і віно, паводле царкоўнага вучэння, святыя і могуць уздзейнічаць на чалавека толькі станоўча.
«Мы ні ў якім разе не падвяргаем сумневу гаючую сілу святых Хрыстовых таямніц! І доказам служыць тая акалічнасць, што пасля прычашчэння нашы дыяканы спажываюць Святыя дары з агульнай чашы [пасля літургіі і прычасця пакінутыя незапатрабаванымі хлеб і віно не знішчаюцца, а ўжываюцца ў ежу святарамі], і ні адзін з іх не захварэў і ніколі не захварэе, — адзначыў патрыярх. — Паколькі я служу без дыякана, я спажываю Святыя дары без усялякага сумневу, з поўнай упэўненасцю ў тым, што, прычашчаючыся Цела і Крыві Хрыстовай, мы прычашчаемся вялікай святыні, якая не падпадае ні пад якую інфекцыю».
У сакавіку 2020 года патрыярх Кірыл і Сінод РПЦ зацвердзілі інструкцыю, згодна з якой падчас пандэміі прадпісваецца адмова ад цалавання крыжа пасля літургіі, а таксама ўзмацняюцца санітарныя правілы пры здзяйсненні сакрамэнтаў — хросту, прычасця і сабаравання.