Patryjarch Kirył: Zarazicca karanavirusam praz pryčaście niemahčyma
Ruskaja pravasłaŭnaja carkva (RPC) nie sumniajecca ŭ tym, što zarazicca karanavirusam praź śviatyja dary padčas pryčaścia niemahčyma, skazaŭ patryjarch maskoŭski Kirył u aŭtorak na pasiadžeńni Sinoda RPC, piša TASS.
13.04.2021 / 17:42
Raniej staršynia Adździeła źniešnich carkoŭnych suviaziaŭ (AZCS) Maskoŭskaha patryjarchata mitrapalit Vałakałamski Iłaryjon (Ałfiejeŭ) zaklikaŭ viernikaŭ nie bajacca pryčaščacca padčas pandemii. Pryhatavanyja dla pryčaścia chleb i vino, pavodle carkoŭnaha vučeńnia, śviatyja i mohuć uździejničać na čałavieka tolki stanoŭča.
«My ni ŭ jakim razie nie padviarhajem sumnievu hajučuju siłu śviatych Chrystovych tajamnic! I dokazam słužyć taja akaličnaść, što paśla pryčaščeńnia našy dyjakany spažyvajuć Śviatyja dary z ahulnaj čašy [paśla liturhii i pryčaścia pakinutyja niezapatrabavanymi chleb i vino nie źniščajucca, a ŭžyvajucca ŭ ježu śviatarami], i ni adzin ź ich nie zachvareŭ i nikoli nie zachvareje, — adznačyŭ patryjarch. — Pakolki ja słužu biez dyjakana, ja spažyvaju Śviatyja dary biez usialakaha sumnievu, z poŭnaj upeŭnienaściu ŭ tym, što, pryčaščajučysia Cieła i Kryvi Chrystovaj, my pryčaščajemsia vialikaj śviatyni, jakaja nie padpadaje ni pad jakuju infiekcyju».
U sakaviku 2020 hoda patryjarch Kirył i Sinod RPC zaćvierdzili instrukcyju, zhodna ź jakoj padčas pandemii pradpisvajecca admova ad całavańnia kryža paśla liturhii, a taksama ŭzmacniajucca sanitarnyja praviły pry ździajśnieńni sakramentaŭ — chrostu, pryčaścia i sabaravańnia.