«Heta niedapuščalna». Ryhor Vasilevič — pra ideju abmiežavać uzrost dla hałasavańnia 70 hadami

Abmiežavańnie pa vierchniaj uzrostavaj miažy (70 hadoŭ) dla ŭdziełu ŭ hałasavańni źjaŭlajecca dyskryminacyjaj, Kanstytucyjnaja kamisija nie prymała i naŭrad ci prymie rašeńni ab uviadzieńni ŭzrostavaha cenzu dla ŭdziełu ŭ hałasavańni. Pra heta Tut.by zajaviŭ člen kanstytucyjnaj kamisii, były staršynia Kanstytucyjnaha suda i były hienprakuror Ryhor Vasilevič.

16.04.2021 / 14:14

Fota Siarhieja Hudzilina

Nahadajem, na STB vyjšaŭ siužet ab čarhovym pasiadžeńni Kanstytucyjnaj kamisii. Viadučaja ahučyła idei, jakija nibyta razhladaje kamisija dla ŭniasieńnia źmianieńniaŭ u Kanstytucyju, u tym liku — dazvolić hałasavać hramadzianam vyklučna va ŭzroście 20-70 hadoŭ.

Ryhor Vasilevič adznačaje, što heta prapanova nie była raspracavana kamisijaj i pryjšła ŭ jaje «zvonku».

Eks-hienprakuror ličyć takoje abmiežavańnie niedapuščalnym.

— Idei mohuć być dobryja i roznyja. U Kanstytucyjnaj kamisii vykładalisia dla viedama prapanovy zvonku, ale jana rašeńniaŭ ab uzrostavym «kalidory» dla ŭdziełu ŭ hałasavańni (vybarach) — ad 20 da 70 hadoŭ — nie prymała i naŭrad ci prymie. Niama nieabchodnaści dakazvać, što abmiežavańnie pa vierchniaj uzrostavaj miažy (70 hadoŭ) dla ŭdziełu ŭ hałasavańni źjaŭlajecca dyskryminacyjaj. Heta niedapuščalna. Taksama admoŭna staŭlusia da pavieličeńnia ŭzrostu dla ŭdziełu ŭ vybarach z 18 hadoŭ da 20 hadoŭ. U niekatorych dziaržavach takoje prava źjaŭlajecca z 19 hadoŭ. U nas ustanoŭleny aptymalny ŭzrost dla maładych ludziej, — skazaŭ Tut.by Ryhor Vasilevič.

Ahučanuju na dziaržTB ideju abmiežavać uzrost dla hałasavańnia raskrytykavaŭ i śpiecpradstaŭnik Śviatłany Cichanoŭskaj pa vybarach Alaksandr Šłyk, jaki 10 hadoŭ prapracavaŭ u BDIPČ ABSIE.

— Nižni paroh u 20 hadoŭ praktyčna biesprecedentny. Va ŭsim śviecie tolki niekalki jurysdykcyj ustalavali paroh ad 20 hadoŭ i vyšej — Nauru, Tajvań, Bachrejn, Aman, Samoa, Takiełau, Tonha, Sinhapur, Małajzija, Kuviejt, Livan i Kamierun. U AAE hałasavać možna tolki z 25 hadoŭ, dy i to nie ŭsim. U nivodnaj krainie — ŭdzielnicy ABSIE paroh nie ustalavany vyšej za 18 hadoŭ, a ŭ niekatorych užo panižany da 17 abo navat 16. Vierchni paroh naohuł praktyčna nie maje prykładaŭ u śviecie, što niadziŭna, pakolki heta supiarečyła b fundamientalnym mižnarodnym standartam. Mižnarodnaje prava pradpisvaje, što abmiežavańni «pavinny hruntavacca na abjektyŭnych i razumnych umovach». Maksimalny ŭzrost da takich nie adnosicca, — adznačaje Šłyk.

Cikava, što ŭ skład Kanstytucyjnaj kamisii ŭvachodziać tyja, chto ŭžo siońnia ci ŭ chutkaj budučyni nie zmahli b hałasavać, kali abmiežavańnie pa ŭzroście ŭ asnoŭny zakon usio ž uniasuć. Naprykład, heta staršynia Pałaty pradstaŭnikoŭ Uładzimir Andrejčanka, jakomu 72 hady. U chutkim časie byli b pytańni i da inšych členaŭ kamisii: mastackamu kiraŭniku «Teatra-studyi kinaakciora» Alaksandru Jafremavu 69 hadoŭ, kiraŭniku Kanstytucyjnaha suda Piatru Mikłaševiču, eks-kiraŭniku Kanstytucyjnaha suda i eks-hienprakuroru Ryhoru Vasileviču i staršyni praŭleńnia SVK «Ahrakambinat Snoŭ» Mikałaju Radamanu pa 66 hadoŭ, jak i Alaksandru Łukašenku.