Pamior kiraŭnik ansambla biełaruskaj pieśni «Ciernica» Iosif Nieściarovič. U jaho byŭ karanavirus
U sieradu na 80-m hodzie pajšoŭ z žyćcia kiraŭnik zasłužanaha kalektyvu «Ciernica» Iosif Nieściarovič. U jaho byŭ karanavirus. Pra heta Tut.by raspaviali jaho blizkija.
30.04.2021 / 15:25
Ciernica
Iosif Nieściarovič razam z žonkaj bolš za try dziesiacihodździ addaŭ ansamblu. Jon u 2002 hodzie staŭ pieršym, kamu było prysvojena zvańnie «Zasłužany amatarski kalektyŭ Respubliki Biełaruś». Ansambl aktyŭna hastralavaŭ pa Biełarusi i za miažoj, atrymaŭ roznyja premii.
Rodnyja Iosifa Alaksandraviča raspaviali, što ŭ muža i žonki Nieściarovičaŭ byŭ dyjahnastavany karanavirus. Mužčyna pravioŭ u balnicy kala dvuch tydniaŭ i pamior u sieradu. U daviedcy ab śmierci — lohačna-sardečnaja niedastatkovaść i dvuchbakovaja pnieŭmanija.
Svoj tvorčy šlach Iosif Nieściarovič pačynaŭ u ansambli «Charoški»: jak kažuć svajaki, «razam z Valancinaj Hajavoj faktyčna stvaraŭ kalektyŭ».
Zatym pracavaŭ u Nacyjanalnym akademičnym narodnym chory imia Citoviča, a paśla hetaha staŭ kiravać «Ciernicaj».
— Jon byŭ taki viasioły, jamu chaciełasia žyć… My ŭsie jaho čakali, — kažuć udzielniki kalektyvu.