Makiej: Uzajemnyja abvinavačvańni zajšli tak daloka, što my nie možam adyhrać nazad

MZS Biełarusi apublikavała poŭnuju viersiju intervju kiraŭnika viedamstva telekanału Euronews, jaki, nahadajem, spyniŭ svajo viaščańnie ŭ Biełarusi pa rašeńni Mininfarma, piša Tut.by.

01.05.2021 / 09:05

Fota Nadziei Bužan

Žurnalistka telekanała nahadała, što biełaruskija ŭłady abvinavačvajuć u šmatlikich i sistematyčnych parušeńniach pravoŭ čałavieka pa vynikach sprečnych prezidenckich vybaraŭ u minułym hodzie. Jana taksama paviedamiła, što była ŭ Minsku i svaimi vačyma bačyła žorsti hvałt u dačynieńni da pratestoŭcaŭ. Karespandentka Euronews zapytałasia va Uładzimira Makieja, ci nie škadujuć biełaruskija ŭłady ab svaich dziejańniach.

— Usia prablema ŭ tym, što my pa-roznamu aceńvajem situacyju, jakaja adbyłasia ŭ Biełarusi ŭ žniŭni minułaha hoda. I siońnia, na žal, uzajemnyja abvinavačvańni zajšli tak daloka, što my nie možam adyhrać nazad. My rasceńvajem padziei minułaha hoda z absalutna inšaha punktu hledžańnia.

Mahčyma, ułada časam dziejničała praźmiernymi mietadami, ale heta była adekvatnaja reakcyja na tyja absalutna nie mirnyja akcyi pratestu, hvałtoŭnyja akcyi pratestu, jakija mieli miesca ŭ Biełarusi.

Jon ličyć, što, «pa sutnaści, była sproba dziaržaŭnaha pieravarotu».

Uładzimir Makiej taksama zajaviŭ, što ciapier u Biełarusi «niama nijakich pratestaŭ, a ludzi pa «pratesnych spravach» zatrymanyja za kankretnyja złačynstvy».

— Što tyčycca tych asob, jakija byli zatrymanyja ŭ svoj čas, pavinien vas zapeŭnić, što jany byli zatrymanyja za kankretnyja złačynstvy i pravaparušeńni, i ja nie dumaju, što ŭ krainach Jeŭrapiejskaha sajuza hetyja pravaparušeńni i złačynstvy aceńvalisia b inakš. Naprykład, vosiem aktaŭ teraryzmu, źviazanyja z padpałami budynkaŭ, padryvami aŭtamabilaŭ i hetak dalej. Dziesiać vypadkaŭ błakavańnia čyhunačnych šlachoŭ. Vielizarnaja kolkaść vypadkaŭ błakavańnia transpartnaha ruchu. Heta ŭsio maje palityčnuju padaploku ci ŭsio ž źviazana z parušeńniami zakanadaŭstva Respubliki Biełaruś?

Jon taksama zajaviŭ, što napady i pahrozy na adras supracoŭnikaŭ orhanaŭ achovy pravaparadku i ich členaŭ siemjaŭ padlahaje kryminalnamu pakarańniu i ŭ jeŭrapiejskich krainach.

Karespandentka Euronews nahadała pra toje, što ŭ Biełarusi 358 čałaviek pryznanyja palitviaźniami (u ciapierašni momant 360 čałaviek), i pacikaviłasia, ci ździejśnili jany realnyja złačynstvy, pryvioŭšy ŭ prykład asudžanych žurnalistak telekanała «Biełsat» Kaciarynu Andrejevu i Darju Čulcovu.

Na heta Uładzimir Makiej adkazaŭ, što nie pradstaŭlaje sudovuju ŭładu i Śledčy kamitet.

— Tamu kazać ab kožnym kankretnym vypadku ja nie mahu, ale my možam vam vysłać adpaviednuju infarmacyju, jakaja paćviardžaje parušeńnie zakanadaŭstva dadzienymi kankretnymi asobami, u kožnym kankretnym vypadku.

U svaju čarhu, jon pryvioŭ u prykład Ziankoviča, Aŭtuchoviča i Alinieviča, jakija zatrymanyja «za kankretnyja sproby ździajśnieńnia terarystyčnych aktaŭ, ździajśnieńnia dziaržaŭnaha pieravarotu». Makiej papraknuŭ zachodniuju presu ŭ tym, što jana heta saramliva zamoŭčvaje, a taksama pacikaviŭsia, čamu Zachad nie reahuje na raskryćcio «spravy ab dziaržpieravarocie».