Bloomberg: Kitajskaja vakcyna CoronaVac pakazała vysokuju efiektyŭnaść ŭ realnym prymianieńni
Kitajskaja vakcyna pakazała małuju efiektyŭnaść padčas vyprabavańniaŭ, ale akazałasia efiektyŭnaj u realnym prymianieńni ŭ Indanezii.
12.05.2021 / 19:34
Fota Depositphotos.com
Sa studzienia da sakavika Indanezija sačyła za 128 290 miedycynskimi rabotnikami, jakija atrymali kitajskuju vakcynu ad kampanii Sinovac. Vyśvietliłasia, što vakcyna abaraniaje pryščeplenych rabotnikaŭ na 98% ad śmierci ad kavidu, na 96% ad špitalizacyi i na 94% ad zaražeńnia karanavirusam, piša Bloomberg.
Ministerstva achovy zdaroŭja Indanezii śćviardžaje, što ŭ krainie nazirajecca rezkaje źnižeńnie kolkaści špitalizacyj i śmierciaŭ ad kavidu siarod miedycynskich rabotnikaŭ.
Na apošnim etapie vyprabavańniaŭ u Brazilii vakcyna CoronaVac pakazała efiektyŭnaść krychu bolš za 50%, što źjaŭlajecca samym nizkim pakazalnikam siarod zarehistravanych vakcyn. Adnak, jak miarkujuć daśledčyki ź Indanezii, pryščepka CoronaVac moža być značna bolš efiektyŭnaj, čym pakazali vyniki vyprabavańniaŭ.
Kab acanić efiektyŭnaść vakcyny, u daśledavańni brali ŭdzieł jak pryščeplenyja rabotniki, tak i tyja, chto nie atrymaŭ vakcyny. Siaredni ŭzrost udzielnikaŭ składaŭ 31 hod.
Pakul 270-miljonnaja Indanezija vakcynavała 22 miljony svajho nasielnictva, i ŭrad płanuje damahčysia kalektyŭnaha imunitetu da kanca hetaha hoda.
Vyniki hetaha daśledavańnia dajuć nadzieju dziasiatkam biednych krain, jakija zaležać ad kitajskaj vakcyny.