Baćka Ramana Pratasieviča: U nas šok
— U nas šok, uśviedamleńnie taho, što toje, što adbyvajecca, nie ŭpisvajecca ni ŭ jakija ramki łohiki i razumnych praviłaŭ. My navat dapuścić nie mahli taki pavarot padziej, — tak prakamientavaŭ Tut.by zatrymańnie błohiera Ramana Pratasieviča jaho baćka Dźmitryj.
23.05.2021 / 17:56
Raman Pratasievič, fota «Viasny»
Ramana Pratasieviča zatrymali paśla avaryjnaj pasadki samalota, jaki lacieŭ z Afinaŭ u Vilniu.
Blizkija Ramana daviedalisia ab zatrymańni syna z tielehram-kanałaŭ. Baćkam było viadoma, što Raman pavinien byŭ lacieć z Afinaŭ siońnia [23 maja], ale jany nie viedali, jakim rejsam i kudy mienavita jon prylacić. A daviedaŭšysia z navin ab pazapłanavaj pasadcy ŭ Minsku samalota z Afinaŭ, zapadozryli niadobraje.
— Kali daviedalisia infarmacyju ab tym, što samalot rejsa Afiny — Vilnia ździejśniŭ pasadku ŭ Minsku, u nas zakrałasia padazreńnie, što niešta tut nie tak. My padumali, što hetym rejsam moh lacieć naš syn. Tak i akazałasia. Dalej my z tielehram-kanałaŭ daviedalisia, što jaho zatrymali, — raspavioŭ baćka Ramana.
Dźmitryj paznaŭ syna na fatahrafii, apublikavanaj u tym liku ŭ tielehram-kanale Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS (paźniej fatahrafija ŭ hetym tielehram-kanale była vydalenaja).
Što z błohieram ciapier i dzie jon znachodzicca, baćki nie viedajuć, aficyjna im ničoha nie paviedamili, a telefon Ramana Pratasieviča niedastupny.
U Hrecyju Pratasievič jeździŭ u adpačynak, kažuć baćki. Pra jaho miescaznachodžańnie viedała abmiežavanaje koła ludziej.
— Heta była vyklučna naša infarmacyja. Jon nikomu nie chacieŭ kazać. I ad nas nichto nie moh daviedacca, što nam viadoma, dzie znachodzicca naš syn.
Raman Pratasievič — 26-hadovy biełaruski aktyvist, błohier i redaktar kanałaŭ, pryznanych u Biełarusi ekstremisckimi. U listapadzie minułaha hoda Śledčy kamitet Biełarusi zavioŭ suprać Pratasieviča kryminalnyja spravy pa niekalkich artykułach.
Jon prachodzić abvinavačanym pa artykule 293 KK («Masavyja biesparadki»), artykule 342 KK («Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich») i artykule 130 KK («Raspalvańnie rasavaj, nacyjanalnaj, relihijnaj albo inšaj sacyjalnaj varožaści»). Akramia taho, u KDB jaho ŭnieśli ŭ pieralik arhanizacyj i fizičnych asob, jakija majuć dačynieńnie da terarystyčnaj dziejnaści. Taksama Raman byŭ abvieščany ŭ miždziaržaŭny vyšuk.