Dyk ci palacim na mora? Zadali niekalki aktualnych pytańniaŭ turapierataram nakont čartaraŭ
dapoŭniena
Z kožnym dniom usio bolš jeŭrapiejskich krain anansuje pra spynieńnie avijaznosin ź Biełaruśsiu. U takich umovach tolki za siońnia «Biełavija» vymušana admianiła paloty ŭ vosiem krain da 30 kastryčnika. Ludzi, jakija nabyli (ci płanavali nabyć) tury i chacieli palacieć u adpačynak, zadajucca łahičnym pytańniem: a što čakaje čartary? Raspytali ŭ pradstaŭnikoŭ bujnych turystyčnych ahiencyj i ŭ kansalidataraŭ rejsaŭ. Publikujem asnoŭnyja tezisy z taho, što nam zmahli paviedamić.
27.05.2021 / 17:33
Fota: belavia.by
Kudy jašče lotaje «Biełavija»?
Pa stanie na 27 maja dastupnymi ličylisia kirunki ŭ Izrail, na Kipr, u Sierbiju, Vienhryju i Małdovu. Adkrytym dla vyletaŭ zastajecca rasijski kirunak i ahułam «uschod».
Što z čartarami prosta zaraz?
Pakul usie čartarnyja rejsy (u tym liku siońniašnija), jakija ŭ nas absłuhoŭvaje vyklučna «Biełavija», byli vykananyja biez prablem. Usie vylety, navat u papularnyja ŭ biełarusaŭ sioleta Ałbaniju i Čarnahoryju, prajšli spakojna.
Śpiecyjalist pa čartarach raskazaŭ «Našaj Nivie», što i maršrut u Turcyju praz Ukrainu zastaŭsia raniejšym, mianiać pakul ničoha nie pryjšłosia. U štatnym režymie samaloty adpraŭlajucca i ŭ papularnyja Tunis, Jehipiet.
«Kali nas i čakajuć prablemy, to, viadoma, u pieršuju čarhu na jeŭrapiejskich kirunkach. Samymi «stabilnymi» na najbližejšuju budučyniu vyhladajuć varyjanty adpačynku ŭ AAE, Hruzii i na Maldzivach. Ale pakul usie našy vylety ŭ pryncypie iduć pa prahramie, bieź niejkich źmianieńniaŭ», — prakamientavali nam adrazu ź niekalkich turystyčnych kampanijach.
Što turystyčnyja kampanii płanujuć rabić u vypadku fors-mažoraŭ?
Usie adznačajuć, što ŭ dadzienaj situacyi prychodzicca žyć adnym dniom, ale ŭ vypadku jašče bolšaj pavietranaj izalacyi kampanii zhadajuć instrukcyi ź minułaha hoda, kali šmat jakija krainy začynilisia dla turystaŭ praz karanavirus.
«Letaś my prapanoŭvali klijentam pakidać depazit i zachoŭvać hrošy da lepšych časoŭ. Taksama realnaja zamiena «zabaronienaj» krainy na inšuju, dastupnuju dla vyletaŭ. Nu, i nichto nie admianiaŭ strachoŭku ad niavyletaŭ i viartańnie hrošaj za tur — šlachi vyrašeńnia prablemy buduć abiracca ŭ indyvidualnym paradku».
Ci mahčyma «dakupić» vylet z Rasii, kali pryjdziecca?
Navat kali dla «Biełavii» zakryjuć usie zachodnija kirunki, zastajecca varyjant vyletaŭ z Maskvy. Ale na hety momant Maskva jak startavy punkt nie razhladajecca.
«My b chacieli dać hramadzianam bolš infarmacyi, ale pakul, jak i zvyčajnyja ludzi, uvieś čas manitorym naviny i čakajem novaj infarmacyi. Situacyja moža kardynalna źmianicca ŭžo zaŭtra. Ale my vierym, što mienavita čartary sankcyi ES nie zakranuć: heta nikomu nie vyhadna», — kamientuje pradstaŭnik adnaho z bujnych biełaruskich kansalidataraŭ čartarnych rejsaŭ.
Ad bolš razhornutych kamientaroŭ u biełaruskich kampanijach pakul što admaŭlajucca.
UPD: 28 maja paśla taho, jak Ukraina aficyjna anansavała, što taksama zakryvaje pavietranuju prastoru dla samalotaŭ Biełarusi z 29 maja, apieratary paviedamili pra spynieńnie prodažaŭ turaŭ u Bałharyju, Čarnahoryju i Ałbaniju.
«My budziem pracavać nad alternatyŭnymi maršrutami ci prapanoŭvać zamienu nakirunkaŭ usim, chto ŭžo nabyŭ tury ŭ hetyja krainy», — dadaŭ adzin ź pieravozčykaŭ.