Лукашэнка: Пуцін сказаў, што праблем з пастаўкамі нафты не будзе
Лукашэнка сёння правёў нараду па пытаннях супрацоўніцтва з Расіяй, на якой таксама расказаў пра вынікі візіту ў Сочы і перамовы з Уладзімірам Пуціным.
01.06.2021 / 12:37
БелТА
Тэма пастаўкі расійскіх вуглевадародаў на беларускія нафтаперапрацоўчыя прадпрыемствы набыла новае гучанне на фоне санкцый ЗША, якія загадваюць спыніць усе стасункі з Наваполацкім НПЗ, адзначае БелТА.
«Урады вельмі сур'ёзна прапрацавалі гэтае пытанне, і як мінімум мы дамовіліся, што ніякіх пытанняў з пастаўкамі нафты не будзе. Расіі гэта выгадна. Мы можам 22 мільёны тон нафты перапрацаваць, — адзначыў Аляксандр Лукашэнка. — Па пастаўках нафты для НПЗ Беларусі ніякіх праблем не будзе, так было сказана прэзідэнтам Расіі. Як і з пастаўкамі нафтапрадуктаў на рынак Расіі, і на знешні рынак».
Па словах Лукашэнкі, пастаўкі будуць ажыццяўляцца ў запланаваных аб'ёмах. Таксама на сустрэчы была дасягнута прынцыповая дамоўленасць па мінімізацыі страт беларускіх НПЗ ад падатковага манеўру ў Расіі з 1 студзеня 2022 года. Урадам даручана канчаткова адпрацаваць гэтую схему.
«Па падатковым манеўры мы знайшлі развязкі. Нават не мы, а ўрады, мы проста гэта ўзгаднілі і зацвердзілі. Далей будзем весці дыялог і дамаўляцца», — сказаў ён.
Таксама Лукашэнка сказаў, што пытанне вайсковых баз не абмяркоўвалася.
«Ніякіх абмеркаванняў у плане перакідання ўзброеных сіл Расіі на пастаяннай аснове, стварэння нейкіх баз, пра гэта нават гаворкі не ішло. І гэта нам не трэба. Таму што па нашай канцэпцыі ваеннай бяспекі Саюзнай дзяржавы ў гэтым пакуль няма ніякай неабходнасці. Будзе нейкая насцярожанасць, мы будзем бачыць актывізацыю ў НАТА, аж да ваеннага канфлікту — на працягу сутак (базы ў нас, аэрадромы і іншае вызначаны) расійскія падраздзяленні і войскі будуць перакінутыя ў Беларусь», — сказаў Лукашэнка.