Va Ukrainie paabiacali sankcyi, kali «choć adzin biełaruski samalot» apyniecca ŭ Krymie
U MZS Ukrainy papiaredžvajuć, što Ukraina ŭviadzie sankcyi, kali choć adzin samalot biełaruskaj avijakampanii apyniecca na terytoryi akupavanaha Kryma. Pra heta zajaviła pieršaja namieśnica ministra zamiežnych spraŭ Ukrainy Eminie Džaparava ŭ kamientary Ukrinform.
02.06.2021 / 14:23
«My zafiksavali dla siabie vykazvańni spadara Łukašenki ab zvarocie da Rasii i Pucina z mahčymym adkryćciom avijarejsaŭ u akupavany Krym. My budziem dziejničać imhnienna suprać lubych sprobaŭ lehitymizavać akupacyju Kryma Rasijaj, suprać lubych sprobaŭ naviazać kantakty z tak zvanymi «ŁNR» abo «DNR». I kali choć adzin samalot biełaruskaj avijakampanii apyniecca na terytoryi akupavanaha Kryma, sankcyi buduć niepaźbiežnyja z usimi niehatyŭnymi nastupstvami», — skazała jana.
Jana padkreśliła, što ŭsia paŭnata adkaznaści za sankcyi i abmiežavańni dziaržavami śvietu, u tym liku Ukrainy, pavietranych znosin ź Biełaruśsiu i za niazručnaści, jakija adčuvajuć z-za hetaha hramadzianie Biełarusi, lažyć na Łukašenku.
Džaparava taksama adznačyła, što rašeńnie abmiežavać pavietranyja znosiny ź Biełaruśsiu — pytańnie nie palityki, a biaśpieki.
Pa jaje słovach, Ukraina całkam salidarnaja ŭ svaich dziejańniach z pazicyjaj ES, ZŠA i ŭsiaho demakratyčnaha śvietu adnosna reakcyi na dziejańni Łukašenki.
Nahadajem, 1 červienia Alaksandr Łukašenka paprasiŭ prezidenta Rasii Uładzimira Pucina dapamahčy biełarusam trapić u akupavany Krym praz Rasiju.