U Paŭdniovaj Afrycy dvoje bratoŭ zasnavali kryptapłatformu, a paśla źnikli z 69 tysiačami bitkojnaŭ
Vidać, bratam udałosia arhanizavać najbujniejšuju kryptaafieru ŭ śviecie.
25.06.2021 / 00:05
Fota Depositphotos.com
Dvoje bratoŭ-zasnavalnikaŭ paŭdniovaafrykanskaj płatformy Africrypt, pryznačanaj dla kryptavalutnych inviestycyj, źnikli z bujnoj sumaj u bitkojnach, paviedamlaje Bloomberg.
Na momant źniknieńnia 17-hadovaha Amira i 20-hadovaha Raisa Kiejdžy suma, jakuju jany skrali z ułasnaj płatformy, zasnavanaj u 2019 hodzie, dasiahnuła 3,6 miljarda dalaraŭ, abo 69 tysiač bitkojnaŭ.
Płatforma Africrypt pracavała z zamožnymi kłijentami i znakamitaściami. Jaje zasnavalniki abiacali štodzionny prybytak da 10%. Mnohija inviestary razhladali hetu płatformu jak «sakretny šlach u śviet nieabmiežavanaha bahaćcia», piša Coingeek. Mnohija kłijenty inviestavali na płatformie bolš za 100 tysiač dalaraŭ.
13 krasavika kurs bitkojna dasiahnuŭ bolš za 60 tysiač dalaraŭ. Amir Kiejdžy ŭ toj ža dzień napisaŭ inviestaram, što płatformu ŭzłamali. Junak paprasiŭ kłijentaŭ nie źviartacca da jurystaŭ i ŭrada, bo heta pieraškodzić chutka viarnuć srodki.
Adnak niekatoryja inviestary źviarnulisia ŭ jurydyčnuju kampaniju Hanekom. Jurystam udałosia vyjavić, što inviestary nie mieli dostupu da siervieraŭ płatformy ŭžo za tydzień da mierkavanaha ŭzłomu. Srodki z rachunkaŭ płatformy vyvieli takim čynam, što adsačyć ich niemahčyma.
Pa infarmacyi Hanekom, praź niekalki dzion paśla «ŭzłomu» braty źjechali z PAR u Vialikabrytaniju, adnak nivodny z zasnavalnikaŭ płatformy nie vychodzić na suviaź. A sajt Africrypt nie pracuje.
Orhan finansavaha kantrolu PAR paviedamiŭ, što vyvučaje incydent z Africrypt, ale nie moža raspačać rasśledavańnie, bo pa zakonie kryptaaktyvy nie ličacca finansavymi praduktami.