Režysiora i aktyvista Turoviča pasadzili na 6,5 hoda: zachoŭvańnie zbroi i zamach na machlarstva
Prysud ustupiŭ u siłu, 62-hadovaha Alaksieja Turoviča užo pieraviali ŭ kałoniju №14 pad Barysavam (bolš viadomuju jak «Navasady»).
02.07.2021 / 14:42
Padrabiaznaści spravy «Našaj Nivie» raspavioŭ advakat Alaksandr Fiłanovič, jaki abaraniaŭ Turoviča.
«Historyja, zdajecca, i nie palityčnaja, ale dziŭnaja. Turoviča abvinavacili ŭ zamachu na machlarstva ŭ asabliva bujnym pamiery i ŭ zachoŭvańni zbroi.
Turovič — dastatkova zabiaśpiečany čałaviek, u svoj čas byŭ pradprymalnikam, mieŭ nieruchomaść, jakuju pieryjadyčna pradavaŭ. Mieŭ kvateru, mašynu, dom, kvateru ŭ Pieciarburhu. Časam jon davaŭ ludziam hrošy ŭ pazyku pad pracenty.
I ŭ hetaj situacyi jon pazyčyŭ čałavieku hrošy: 82 tysiačy jeŭra ŭ rasterminoŭku na 10 ci 11 hadoŭ. Pa damovie, jakuju zaśviedčyli nataryjalna, — raskazvaje advakat. — Ale čałaviek nie pačynaŭ spłačvać pazyku i niedzie praz dva miesiacy sam padaŭ u sud, kab pryznać damovu biezhrašovaj — faktyčna kab dakazać, što tyja hrošy Turovič jamu nie pieradavaŭ. My pradjavili sustrečny pazoŭ, kab vypatrabavać hetyja hrošy.
Paralelna z pryznańniem damovy biezhrašovaj na Turoviča zaviali kryminalnuju spravu ab zamachu na machlarstva ŭ asabliva bujnym pamiery. Adkaznaść za zamach takaja samaja, jak za ździejśnienaje machlarstva.
A zbroju znajšli padčas pieratrusu. Heta traŭmatyčny pistalet, jaki jamu jašče ŭ 90-ja hady padaryli siabry. Ekśpiert pryznaŭ pistalet «ahniastrelnaj zbrojaj traŭmatyčnaha ŭdziejańnia, jakaja nie źjaŭlajecca ahniastrelnaj zbrojaj». Tym nie mienš sud dapytaŭ ekśpierta, paśla było dadatkovaje zaklučeńnie ekśpiertyzy, u vyniku sud pryznaŭ pistalet ahniastrelnaj zbrojaj.
Usio heta było ŭ 2019-2020 hadach. Pakul išła sprava i sud, Alaksieja nie zatrymlivali, jon byŭ pad padpiskaj. U lutym 2021 hoda Turoviča asudzili na 6,5 hadoŭ. Jaho ŭziali pad vartu paśla ahałošvańnia prysudu.
Sam Turovič vinu nie pryznaŭ ni pa adnym z artykułaŭ. Ja sam składu złačynstva ŭ jaho dziejańniach ab machlarstvie taksama nie baču».
Abarona padavała apielacyju, ale prysud pakinuli ŭ sile. Na prysud mahło paŭpłyvać i toje, što Turovič užo byŭ asudžany.
«Turovič mieŭ niepahašanuju sudzimaść, i ciapierašnija dziejańni rasceńvajucca jak niebiaśpiečny recedyŭ. Adpaviedna, sud musić pryznačać pakarańnie, nie mienšaje za pałovu ad maksimalnaha. Pa zbroi maksimalna było 7 hadoŭ, Turoviču dali 3,5 hoda; pa machlarstvie maksimalnaje 10 hadoŭ — Turoviču dali 5 hadoŭ. Šlacham častkovaha składańnia kančatkova pryznačyli 6,5 hoda», — tłumačyć Fiłanovič.
Advakat kaža, što ŭčora naviedvaŭ Turoviča ŭ kałonii. Z administracyjaj prablemaŭ pakul niama. Ale jość prablemy inšaha charaktaru.
U 2009 hodzie Turoviča pasadzili pa troch artykułach Kryminalnaha kodeksu, źviazanych z seksualnym hvałtam i raspusnymi dziejańniami ŭ dačynieńni da chłopčykaŭ, jakim nie było 16 hadoŭ — faktyčna heta abvinavačvańnie ŭ piedafilii.
Jon nie pryznaŭ vinu, pierakonvaŭ, što sprava była sfabrykavanaja, ale atrymaŭ 6 hadoŭ kałonii, ź jakich adsiedzieŭ 4 hady. A da ludziej z takimi artykułami staŭleńnie ŭ miescach pazbaŭleńnia voli nieadnaznačnaje.
«Skažam tak, ciapier tyja ž pytańni da Turoviča znoŭ uźnikajuć. Jany nikudy nie padzienucca», — kanstatuje Fiłanovič.
***
Alaksiej Turovič naradziŭsia ŭ miastečku Hłybokaje Viciebskaj vobłaści, vychoŭvaŭsia ŭ dziciačym domie. U 1994 hodzie skončyŭ škołu-studyju na bazie kinastudyi «Biełaruśfilm». U jakaści režysiora źniaŭ filmy «Turma dla kuma «(2003),» Synok «(2007), «Jabłyk miesiaca» (2008), «Žoŭty piasočak» (2017). Jak akcior zdymaŭsia ŭ «Paskoranaj dapamozie 1», «Anastasii Słuckaj», «Francy+Palina», «List Fielini». Zajmaŭsia biznesam. U 2008 hodzie bałatavaŭsia ŭ deputaty Pałaty pradstaŭnikoŭ.
Paśla pieršaj adsiedki Turovič nie curaŭsia svajho abvinavačvańnia: davaŭ intervju, dzie raskazvaŭ pra staŭleńnie da siabie ŭ kałonii. U apošnija hady niaredka udzielničaŭ u palityčnych akcyjach: suprać restarana ŭ Kurapatach, suprać budaŭnictva AES i inšych.