«Kali štości zdarycca z maim baćkam — heta złaja vola drennych ludziej». Praciahvajuć sudzić Ściapana Łatypava
Adnaviŭsia sud nad žycharom minskaj «Płoščy Pieramien» Ściapanam Łatypavym. Praces spyniali na doŭhi čas: na pieršym ža pasiadžeńni Ściapan zajaviŭ, što supracoŭniki HUBAZiKa pahražali zavieści kryminalnyja spravy ŭ dačynieńni da jaho svajakoŭ i susiedziaŭ, kali jon nie pryznaje vinu, raskazaŭ, što bolš miesiaca pravioŭ u nievynosnych umovach. Zatym — pratknuŭ sabie horła ručkaj prosta ŭ kletcy. Praz heta Łatypava adpraŭlali na psichijatryčnuju ekśpiertyzu, jakaja pryznała jaho zdarovym.
27.07.2021 / 16:20
27 lipienia na sudzie davali pakazańni śviedki. Milicyjant Piatroŭ, jaki zatrymlivaŭ Łatypava, skazaŭ, što paciarpiełym siabie nie ličyć. Dapytali taksama byłuju žonku Ściapana, jakaja acharaktaryzavała jaho vielmi stanoŭča.
Kali suddzia prapanavaŭ Ściapanu zadać pytańnie byłoj žoncy, Łatypaŭ skazaŭ: «Śviedka, vam viadoma, što abvinavačany pražyŭ z vami najlepšyja hady svajho žyćcia?» Suddzia zrabiŭ jamu za heta zaŭvahu.
U pierapynku Ściapan vykazaŭsia: kali niešta zdarycca ź jaho baćkam (jaho sabje mašyna, udaryć małanka, niečakana spynicca serca), to jon budzie ličyć, što «heta złaja vola kahości z drennych ludziej».
Nahadajem, Ściapana Łatypava zatrymali 15 vieraśnia kala murała z «Dydžejami pieramien». Praź niekalki dzion na dziaržtelebačańni vyjšli siužety pra toje, što Łatypaŭ nibyta źbiraŭsia raspylać jady, kab ckavać milicyjantaŭ, ale ŭ spravie hetych abvinavačańniaŭ nie akazałasia. Łatypava abvinavačvajuć pa troch artykułach: «Arhanizacyja hrupavych dziejańniaŭ, što hruba parušajuć hramadzki paradak» (č. 1, 2 art. 342), «Supraciŭ milicyi» (č. 2 art. 363) i «Machlarstva, ździejśnienaje ŭ asabliva bujnym pamiery» (č. 4 art. 209 ). Jamu pahražaje da 10 hadoŭ.