«Святар дрэннаму не навучыць». Бацюшкі заменяць настаўнікаў, якіх не хапае на сяле?
На канале СТБ выйшла інтэрв’ю з кіраўніком праваслаўнай царквы. Веніямін выказаў думку, што святары маглі б весці ўрокі ў сельскіх школах, дзе ёсць дэфіцыт з кадрамі.
03.08.2021 / 14:18
«Можа, на заканадаўчым узроўні зрабіць так, каб святары маглі выкладаць, вучыць дзяцей у школах? — спытаў журналіст у кіраўніка БПЦ. — Гэта і дэфіцыт настаўніцкіх кадраў на сяле будзе вырашаць, плюс дадатковы заробак і выхаванне падрастаючага пакалення. Думаю, праваслаўныя святары дрэннаму школьнікаў не навучаць».
«Цяпер мы сумесна з Міністэрствам адукацыі разглядаем магчымасць і перспектывы атрымання нашымі святарамі ці выпускнікамі духоўных школ дадатковай адукацыі педагагічнай ці праходжання курсаў, што дало б такую магчымасць», — адказаў мітрапаліт.
Ён дадаў, што да гэтага пытання трэба падыходзіць удумліва, але рэалізаваць ідэю магчыма.
Ці значыць гэта, што святары будуць выкладаць у звычайных вясковых школах і заменяць там настаўнікаў, якіх не хапае, напрыклад, па фізіцы ці матэматыцы?
Па каментар «Наша Ніва» звярнулася да Фёдара Поўнага, старшыні сінадальнага аддзела па супрацоўніцтве са свецкімі ўстановамі адукацыі.
«Я размаўляў з Уладыкам пасля інтэрв’ю. Ён меў на ўвазе іншае — нядзельныя школы пры прыходах, дзе меў бы месца педагагічны падыход. Зразумейце, не кожнага святара можна адправіць выкладаць. У цэлым я маю меркаванне, што адукацыя мусіць быць выключна свецкай», — патлумачыў ён.
Па законе, не любы дыплом дае права працаваць настаўнікам. Трэба мець вышэйшую ці сярэднюю спецыяльную педагагічную адукацыю (гэта прапісана ў Адзіным кваліфікацыйным даведніку пасад служачых). Іншы варыянт — чалавек, які пасля ўніверсітэта атрымаў іншую прафесію, можа прайсці перападрыхтоўку па педагагічных профілях. Яна, як правіла, праводзіцца ў ВНУ завочна і займае каля двух гадоў.