Miascovy žychar, jaki znajšoŭ zahinułaha mihranta — padpałkoŭnik u adstaŭcy
Dziaržaŭnyja miedyja nazvali imia miascovaha žychara, jaki, jak śćviardžajecca, znajšoŭ «zahinułaha mihranta». Imia śviedki — Stanisłaŭ Dajlidka z Voranava.
04.08.2021 / 21:09
Dajlidka — viadomy ŭ rajonie čałaviek, jon były vajskoviec, pracavaŭ u vajenkamacie. U zapas vyjšaŭ u zvańni majora, padpałkoŭnikam staŭ paźniej — heta vynikaje z publikacyj «Vajennaj haziety», jakaja ŭ 2013-m nazyvała jaho «majoram-zapaśnikam».
Syn Stanisłava, Vital Dajlidka, zhodna z publikacyjaj, u 2013-m słužyŭ načalnikam adnoj z pahraničnych zastaŭ u Hrodzienskaj vobłaści.
Sioleta ŭžo voranaŭskaja rajonka nazvała Stanisłava padpałkoŭnikam, rapartujučy ab śviatkavańni 23 lutaha, dzie Dajlidka atrymaŭ hramatu — razam ź milicejskimi aficerami.