Нашанівец Андрэй Скурко дасылае маленькаму сыну з-за кратаў уласныя вершы. Чытайце і вучыце са сваімі дзеткамі!
Наш калега Андрэй Скурко дасылае ў лістах з-за кратаў вершы для свайго маленькага сына. Мы ведалі, што Андрэй таленавіты ва ўсім, за што бярэцца, але вось пра паэтычны дар не здагадваліся.
07.08.2021 / 13:04
Андрэй і маленькі Тамаш
Дзверы гнуцца, столь дрыжыць —
Слон прыйшоў да дзеда жыць.
З лесу снежнага ўранку —
Вось бывае нечаканка!
Вуха ў кухні, хвост у спальні,
Левая нага ў вітальні —
У дзядулевай хацінцы
Так няпроста памясціцца.
Адзінока ўзімку дзеду,
Дык і рады ён суседу:
Слон на носе дровы носіць
І ў краму дзеда возіць.
Разважаюць дзед з сланом:
— Можа, нам пабольшыць дом?
…Абжывецца слон паціху —
Прывядзе яшчэ сланіху.
«Слана ў вершы можна лёгка памяняць на зубра, але мне падалося, што так смяшней», — перадае словы Андрэя яго жонка Паўліна.
Напісаць ліст нашым зняволеным калегам можна па адрасе:
СІЗА-1,
вул. Валадарскага, 2
220030 г. Мінск
Скурко Андрэю Генадзевічу
Марціновічу Ягору Аляксандравічу