На Камчатцы ўпаў у возера на глыбіню 100 метраў верталёт з турыстамі. Восем чалавек прапалі без вестак

Верталет Мі-8 кампаніі «Віцязь-Аэра», які перавозіў турыстаў з Масквы і Пецярбурга, пацярпеў катастрофу 12 жніўня на Курыльскім возеры на Камчатцы. Абломкі Мі-8 пайшлі пад ваду на глыбіню больш за 100 метраў практычна адразу пасля крушэння, паведамляе meduza.io.

12.08.2021 / 09:14

ТАСС

На борце Мі-8 знаходзіліся 16 чалавек: 13 пасажыраў, у тым ліку дзіця, і трое членаў экіпажа. Шасцярым пасажырам і двум членам экіпажа ўдалося выбрацца з патанулага верталёта і выплыць на паверхню, дзе іх выратавалі работнікі запаведніка, што аператыўна прыплылі на катэрах да месца крушэння.

Астатнія восем чалавек, у тым ліку камандзір экіпажа Мі-8, як мяркуецца, загінулі.

Пацярпелыя дастаўлены ў Петрапаўлаўск-Камчацкі. Двое з іх знаходзяцца ў цяжкім стане.

На месцы падзення верталёта працуюць дзясяткі ратавальнікаў. Вадалазы пакуль не могуць апусціцца на глыбіню. Па іх словах, тэмпература вады ў возеры цяпер складае не больш пяці-шасці градусаў і доўга знаходзіцца ў ёй немагчыма.