Крыніцы: Арандатарам Dana Mall пачалі прыходзіць лісты з пытаннямі ад еўрапейскіх пастаўшчыкоў
Як стала вядома «Нашай Ніве», некаторым арандатарам гандлёвага цэнтра Dana Mall пачалі прыходзіць недвухсэнсавыя лісты ад еўрапейскіх пастаўшчыкоў з просьбай патлумачыць прыроду адносін з падсанкцыйнымі кампаніямі Карычаў, гандлёвымі цэнтрамі, звязанымі з іх бізнэсам. Гаворка пра самыя розныя крамы: ад адзення да тэхнікі.
19.08.2021 / 17:18
Сербскі бізнэсмен Багалюб Карыч
«Мы не будзем хлусіць і, натуральна, прызнаемся, што мы арандуем плошчы ў Dana Mall. Натуральна, мы прадбачым і наступны ліст пасля нашага адказу, з патрабаваннем выехаць пад пагрозай спынення паставак, і пачынаем да гэта рыхтавацца», — кажа «Нашай Ніве» адзін менеджараў, кампанія якога рыхтуе адказ еўрапейскім пастаўшчыкам.
Іншыя гульцы рынку нерухомасці Мінска патлумачылі, што бізнэс ведае пра гэтыя праблемы: узнікла сітуацыя, калі з Карычамі разрываюць папярэднія дамовы арэнды на яшчэ не здадзеных арэндных плошчах у «Мінск-Міры».
«Цяпер гэта пагражае тым, што заходнія пастаўшчыкі абяруць сабе іншага прадаўца», — кажа абазнаны менеджар.
У канцы 2020 года Еўрасаюз наклаў санкцыі на «Dana Holdings»/«Dana Astra» з аргументацыяй, што гэты бізнэс «падтрымлівае цесныя адносіны з Аляксандрам Лукашэнкам».
Мы хацелі даведацца, як у Dana Mall бачаць будучыню ва ўмовах санкцыйнага ціску, калі арандатараў могуць вымусіць сысці з пляцовак пад пагрозай спынення паставак. Аднак у кампаніі адмовіліся ад вусных каментароў. Мы накіравалі пісьмовы запыт і апублікуем адказ, як толькі яго атрымаем.
Dana Mall — самы буйны гандлёва-забаўляльны цэнтр у Беларусі. Тут знаходзяцца крамы многіх заходніх брэндаў, напрыклад, Zara, Stradivarius, Bershka, Pull & Bear, Oysho, Massimo Dutti, New Balance, I-Store, PANDORA, Next.