Замест «Маскоўскай» — «Мінская». Вуліцы Драгічына атрымаюць беларускія назвы
У пачатку ліпеня мясцовыя ўлады вынеслі на грамадскае абмеркаванне назвы праектаваных вуліц у Драгічыне. Тапаніміка не была прывязана да Беларусі. Але пасля грамадскага розгаласу ўсё змянілася.
25.08.2021 / 09:46
Першапачаткова вуліцы прапаноўвалася назваць «Маскоўскай», «Пятра Баграціёна», «Івана Айвазоўскага» і «Георгія Жукава».
Як адзначаецца на сайце райвыканкама, да іх прыйшло 27 лістоў, у якіх былі прапанаваныя 92 варыянты назваў.
У выніку чыноўнікі прапанавалі наступнае рашэнне. Са старога спісу застаўся толькі славуты савецкі маршал. Вуліца Маскоўская стала Мінскай, Баграціёна — Міхаіла Герасімава (гэта партызан часоў Вялікай Айчыннай), Айвазоўскага — Юрыя Блінова (ураджэнец Драгічына, піяніст, адзін з уладальнікаў клуба «Крумкачы»).
Гэтыя прапановы адпраўлены на зацверджанне ў Драгічынскі раённы савет дэпутатаў.