«Сыравінай мы забяспечаны як мінімум да кастрычніка-лістапада». Стала вядома, як санкцыі ўдарылі па тытунёвай галіне
Старшыня канцэрна «Белдзяржхарчпрама» Анатоль Бубен у эфіры БТ распавёў, як спраўляецца з санкцыямі Гродзенская тытунёвая фабрыка «Нёман». Фабрыка трапіла пад санкцыі ЗША, а пад абмежаванні Вялікабрытаніі — уся галіна.
27.08.2021 / 19:33
Раней тытунёвая фабрыка «Нёман» працавала пераважна на еўрапейскай сыравіне.
— Цяпер павярнуліся ў азіяцкі кірунак. І спадзяемся, што з гэтымі праблемамі мы справімся. Прынамсі, сыравінай мы забяспечаны як мінімум да кастрычніка-лістапада, — адзначыў Анатоль Бубен.
Прадпрыемства спадзяецца знайсці альтэрнатыўную сыравіну на кітайскім рынку.
Некаторыя матэрыялы для вытворчасці замянілі аналагамі беларускай вытворчасці, у тым ліку араматызатары. Клішэ, якое наносіцца на цыгарэту, пастаўляе расійская кампанія, раней іх выраблялі ў Германіі.
Ёсць пытанні па банкаўскіх плацяжах. «Але гэтыя пытанні вырашаюцца. Калі не ў гэты дзень, то на наступны пераводы праводзяцца», — адзначыў чыноўнік.