Dziaržava padaryła pryvatnaj achoŭnaj struktury try hiektary ziamli i 2200 «kvadrataŭ»
Jak stała viadoma «Našaj Nivie», niadaŭna tajamničaja pryvatnaja achoŭnaja arhanizacyja «HardServis» atrymała ad dziaržavy ščodry padarunak — na biezvypłatnaj asnovie firmie padorany vialiki kompleks, jaki raniej naležaŭ BFSA «Dynama».
08.09.2021 / 08:21
BFSA «Dynama» kuryrujecca Savietam biaśpieki i maje dziesiać zasnavalnikaŭ: MUS, Pahraničny kamitet, Prakuraturu, MNS, Mytny kamitet, DFR, KDB, Słužbu biaśpieki prezidenta, SK, Dziaržkamitet sudovych ekśpiertyz.
Da niadaŭniaha času BFSA «Dynama» ŭ Minsku naležaŭ vialiki kompleks pa vulicy Karvata, 85 razam z prylehłaj terytoryjaj u 3,6 hiektara.
Vyhlad budynka z terytoryjaj sa spadarožnika
Ale letam ziamla razam z budynkami adyšła pryvatnaj struktury «HardServis». U kadastry značycca, što metavaje pryznačeńnie ŭčastka ŭ červieni źmianiłasia. Ciapier jon słužyć «dla absłuhoŭvańnia abjekta budaŭnictva «Uźviadzieńnie vučebna-trenirovačnaha kompleksa».
Sam budynak płoščaj 2196 kvatratnych mietraŭ taksama naležyć «HardServisu». U apisańni skazana, što na terytoryi majecca tenisny kort, trenirovačnaja placoŭka, atletyčny siektar, futbolnaje pole i inš.
Padstava rehistracyi: «Damova pamiž BSFA «Dynama» i Tavarystvam z abmiežavanaj adkaznaściu «HardServis» ad 04.09.2020 №02.01-02/48sp ab pradastaŭleńni biazvypłatnaj (sponsarskaj) dapamohi».
Kolki kaštuje taki ŭčastak, skazać składana, bo zvyčajna pytańnie koštaŭ vyrašajecca ŭ zaležnaści ad taho, u jakich metach budzie vykarystoŭvacca ziamla.
Naprykład, u hetym ža rajonie pradajuć 7 sotak za $90 tysiač pad budaŭnictva pryvatnaha doma. Kali ekstrapalavać, to 3,6 hiektara pa takich cenach kaštavali b kala $4,6 miljona dalaraŭ.
Miž tym, płošča budynka suvymiernaja z asobnymi karpusami Vajennaj akademii. Kolki jon kaštuje, padličyć jašče bolš składana. Viadoma, što ŭ peŭny čas kiraŭnictva BFSA «Dynama» mieła ideju stvaryć na bazie hetaj terytoryi centr dla padrychtoŭki zamiežnaha śpiecnaza.
Ahułam ža kompleks vykarystoŭvaŭsia dla trenirovak biełaruskich śpiecyjalnych atradaŭ.
Nam nie ŭdałosia źviazacca z kiraŭnictvam BFSA «Dynama», kab prajaśnić abstaviny dziŭnaha padarunka: vypadki, kali dziaržava doryć takuju kolkaść ułasnaści, sapraŭdy redkija i ŭnikalnyja.
«HardServis» — pieršaja pryvatnaja achoŭnaja arhanizacyja, supracoŭniki jakoj, zhodna z ukazam Łukašenki №277, majuć prava na našeńnie i ŭžyvańnie bajavoj zbroi.
Ekśpierty sychodziacca na dumcy, što dziejnaść arhanizacyi nakiravanaja na zamiežža — achovu tych biełaruskich abjektaŭ u Łacinskaj Amierycy i Afrycy, dla achovy jakich niemahčyma pryciahnuć rehularnyja siły.