Krynicy: zachodnija banki zakryli rachunki ŭ valucie Biełarusbanka, Biełahraprambanka i Bielinviestbanka. Heta katastrofa?
Jak stała viadoma «Našaj Nivie», na minułym tydni asnoŭny bank-karespandent biełaruskich dziaržaŭnych bankaŭ, «DojčeBank», zakryŭ karespandenckija rachunki ŭ jeŭra. Pavodle paviedamleńniaŭ krynic, anałahičnym čynam paviali siabie inšyja zamiežnyja banki. Raniej Bielinviestbank, Biełarusbank i Biełahraprambank trapili pad jeŭrapiejskija sankcyi.
13.09.2021 / 12:33
U adkrytych krynicach možna ŭbačyć situacyju, naprykład, u Biełahraprambanku.
Vyhladaje jana biazradasna: mahčymaść valutnych tranzakcyj zastajecca tolki praz drobnyja biełaruskija banki, a taksama rasijski TKB Bank, jaki pavodle miascovaha «Forbs» zajmaje 87 miesca ŭ rejtynhu nadziejnaści rasijskich bankaŭ.
A voś, naprykład, jak situacyja vyhladała paru hadoŭ tamu, pavodle kešu toj ža veb-staronki.
Valutnyja apieracyi možna było rabić praz ceły šerah jeŭrapiejskich karespandentaŭ, ad italjanskich i polskich da amierykanskich.
Z rasijskich partnioraŭ u śpisie byli bujnyja «Śbier», «Rossielhasbank», VTB i «Rosbank». Ciapier u śpisie karespandentaŭ ich taksama niama.
Pa našaj infarmacyi, anałahičnaja situacyja skłałasia ŭ Biełarusbanku i Bielinviestbanku. U Biełarusbanku pieravody ŭ jeŭra jašče mahčymyja praz jeŭrapiejskuju dočku VTB Banka.
Ekanamist: nastupstvy — strata dachodaŭ
Što heta aznačaje? Jak tłumačyć «Našaj Nivie» ekanamist Dźmitryj Kruk, u sučasnym śviecie bank biez karespandenckich rachunkaŭ u dalarach i jeŭra ŭ lubym z bankaŭ ZŠA i Jeŭrazony ličycca niepaŭnavartasnym, i heta ciahnie nastupstvy.
«Praz karespandenckija rachunki banka idzie ruch srodkaŭ kłijentaŭ: płaciažy jurasobaŭ pa ekspartna-impartnych i finansavych kantraktach, a taksama šmatlikija płaciažy fizasobaŭ (ale heta nie tyčycca adrazu ž roźničnych płaciažoŭ praz kartačnyja sistemy).
Bank, jaki nie ŭ stanie zadavolić hetyja, amal štodzionnyja, patreby kłijentaŭ, aŭtamatyčna stračvaje adpaviednyja kamisijnyja dachody ad arhanizacyi mižnarodnych raźlikaŭ.
U pieravažnaj bolšaści vypadkaŭ adpaviednyja kamisijnyja dachody składajuć nie vielmi značnuju častku ad ahulnych dachodaŭ banka. Ale kali navat ich dola składaje da 5% ad ahulnych, heta ŭsio roŭna adčuvalna.
Takija dachody «lohkija», bo banki ŭ takich vypadkach amal nie biaruć na siabie ryzyku (paraŭnajcie z dachodami ad depazitaŭ). Heta aŭtamatyčnaje i vidavočnaje nastupstva, ale daloka nie samaje važnaje.
Ad takich bankaŭ-«impatentaŭ» kłijenty pa łohicy pavinny sychodzić da kankurentaŭ (kali svabodnyja ŭ vybary, dziaržaŭnyja arhanizacyi, naprykład, nie mohuć), bo raźliki praz takija banki stanuć daražejšymi i bolš marudnymi, z dadatkovymi ryzykami.
Narešcie, siońnia mnohija pryznajuć, što sfiera płaciažoŭ stała stratehičnaj dla raźvićcia bankaŭskaha biznesu.
Praz jaje źbirajecca big data (vielizarny abjom raznastajnych źviestak — zaŭv. «Našaj Nivy»), jon dazvalaje stvarać novyja praduktovyja liniejki. U hetym sensie, aktyŭny ŭdzieł u raźlikach — važny padmurak finansavych inavacyj. Bank, jaki nie moža ich pravodzić, budzie žyć va ŭčorašnim dni, dumać nie ab raźvićci, a ab vyžyvańni», — kaža Kruk.
Bizneśmien: pradprymalniki buduć uciakać z hetych bankaŭ
Adzin z apytanych nami bizneśmienaŭ skazaŭ, što technična ruch valuty mahčymy praz «maleńkija aeradromy» ŭ vyhladzie drobnych biełaruskich i marhinalnych rasijskich bankaŭ, ale heta ŭsio vielmi abciažarvaje vykanańnie isnych kantraktaŭ i stavić pad pahrozu novyja: maŭlaŭ, pradprymalniki z hetych bankaŭ buduć uciakać.
«Raniej pramarudžvańnie płaciažu na try dni ličyłasia skandałam, ciapier užo dva tydni — heta jak by norma, bo hrošy abychodziać pałovu śvietu, kab dajści kudy treba.
Jeŭrapiejskija partniory vielmi časta nie adhružajuć tavar, pakul nie ŭbačać hrošy, u vyniku ty hublaješ kantrakty ci mocna vybivaješsia z damoŭlenaściaŭ.
Dumaju, pryvatny siektar, kali całkam zrazumieje, što heta nie časovaja prablema, budzie pierachodzić u inšyja banki abo šukać mahčymaści vieści raźliki praz banki ŭ susiednich krainach», — skazaŭ naš surazmoŭca.